Святой ап. Андрей Первозванный первым из апостолов последовал за Христом. Верный ученик Христов неустанно нёс людям проповедь о Спасителе. По его молитвам Господь совершал многие чудеса. Закончил он свой земной путь мученической смертью. Будем прославлять в своих молитвах св. ап. Андрея, надеясь на его молитвенное заступничество о нас перед Господом. Память св. ап. Андрею Первозванному 30 ноября (13 декабря по гражданскому стилю).
——————————————————————
Общее начало и конец всем канонам →
Порядок чтения по уставу
——————————————————————
Тропарь, глас 4-й
Яко апостолом первозванныи, и верховному истыи брат, Владыце всех Андрее молися, мир вселенней даровати, и душам нашим велию милость. (Дважды).
Слава, и ныне. Богородичен. Иже от века утаенное, и ангелом несведомое таиньство. Тобою Богородице земным явися, Бог в неразмесне снятии воплощаемь, и крест волею нас ради восприим. Им же воскресив первозданнаго, и спасе от смерти душа наша.
Содержание
КАНОН, глас 1-й
Песнь 1. Ирмос
Твоя победителная десница, боголепно в крепости прославися. Та бо безсмертне, всемогущи, противныя сотре. Израильтяном путь глубины обновльши.
Запев: Святыи апостоле Андрее, моли Бога о нас (поклон).
Смущеную ми душу, помышлении же и словесы, очисти вселшеюся в тя, проповедателю Христов Андрее божественою благодатию. Яко да чисте ти источу песней воды.
Запев. Честныи предотеча Христов, своих ученик верховнаго, иже от неплоднаго чрева ветвь, от Девы рождьшемуся Христу, препрославленаго Андрея, радуяся приведе.
Слава. Желанием и любовию не уклонною, добро детелных степень начен, и восхождении присно поучаяся, от худыя силы к верховней Андрее силе постиже.
И ныне. Богородичен. Радуися благодатныи источниче. Радуися лествице, и двере небесная. Радуися свещниче, и ручко златая, и горо несекомая, яже жизнодавца Христа мирови рождьшая.
Катавасия. Избави от бед рабы своя, святыи апостоле Андрее, яко вси по Бозе к тебе прибегаем, ты бо молиши о нас Христа Бога нашего (поклон). Господи помилуй (трижды с поклонами).
Песнь 3. Ирмос
Едине сведыи земных существо немощное, и милостивно в не оболкиися, препояши мя свыше силою воспевати ти святыи, церкви душевная, неизреченныя Ти славы Человеколюбче.
Запев. Притече жаждею не зван Андрее, но своим изволением, к животному источнику, яко елень. И всем сего обрет проповеда. И пив, напоил еси нетленными водами, истаявшыя жаждею концы.
Запев. Мрежею словесною, из глубины прелести уловил еси словесныя рыбы апостоле. И трапезе Христове снедь честную принесе, просвещену благодатию, явльшагося плотным подобием.
Слава. Уведе естественыя законы Андрее достославне. И приобщника сродника прием, вопия, обретохом желаемаго и путь сотворившему плотное рождение, проповеда разум духовныи.
И ныне. Богородичен. Облак Тя легкии неложно Дево имянуем, пророческим последующе беседам. Прииде бо на Тя Господь, низложити египетская прелестная рукотворения, и просветити сим служащих. Катавасия.
Седален, глас 8-й. Яко первозваннаго вси ученика самовидца слову и слугу, Андрее апостоле подолгу чтем тя. Ибо агньцу вземлющему миру прегрешения, несуменною верою, тепле последовал еси. Тем и страсти нас ради волею пострадавшаго, подражатель явися. Сего ради вопием ти, моли Христа Бога, грехов оставление подати, чтущим любовию святую память твою.
Слава, и ныне. Богородичен. Радуися престоле, огнеобразныи Божии. Радуися Отроковице, седалище царское. Ложе, преиспещренно постланое. Златопорфирныи чертоже, риза лучецветная. Украшенныи образ, молненосное оружие. Светилник многосветлыи. Радуися Богородице, дванадесятостенныи граде, и дверь златокованная, и полато светообразная. Светлопозлащенная трапезо, богоукрашенная сень. Радуися славная невесто, солнца каплющая. Радуися едина души моей благолепие.
Песнь 4. Ирмос
Гору Тя благодати Божия присенну, прозорливыма Аввакум усмотрив очима ис Тебе изыти Израилю. Провозглашаше святаго, на спасение наше и обновление.
Запев. Божественая потребителная, яже горшаго, вседетельная и светозарная, духовная сила в тя Андрее всельшися боголепно, огненым языком, неизреченных показа тя проповедателя.
Запев. Не оружия отмщению взят плотьская, на потребление лютых утверждении вражиих, Андрее всечестне. Но Христом оградився, пленив языки в послушание. Гору тя каплющу разумное веселие, преестественыи Бог, осуществивыися еже о нас Андрее яви. Горы горския бесовскаго возношения, потребляющу силою духовною.
Слава. Любовию совершающим твою память песньми, обилна дара учителя своего Христа, Андрее всебогате, духовнаго веселия воды исполняя, непрестай молитвами си.
И ныне. Богородичен. Поем велие и страшное Твое таинство. Премирных бо утаився чиноначалии, на Тя сыи сниде яко дождь на руно Препетая, на спасение наше и обновление. Катавасия.
Песнь 5. Ирмос
Просвещеи сиянием пришествия Твоего Христе, и уяснив крестом си мирския концы. Сердца просвета светом Твоего богоразумия, православно хвалящих Тя.
Запев. Приял еси Его же возжеле, Андрее всехвалне. В нетленныя с Ним вшед обители, болезненыя рукояти своя пожав достойно. Тем же тя песньми славим.
Запев. Напряг тя яко стрелу силну блаженне, пусти в весь мир Господь, острупляя бесовы. И зловерием человеки острупленыя исцеляя.
Слава. Возлюбил еси Владыку. И вслед Того погнав стоп, к животу наставляющих и Того страсти неложно пречестне Андрее даже до смерти подражая.
И ныне. Богородичен. Приношения верно приносящих Препетая не презри. Но приими, и сия принеси Сыну Своему Чистая. Богу единому Благодателю. Тя бо заступницу имамы. Катавасия.
Песнь 6. Ирмос
Обыде нас последняя бездна, несть избавляяи, вменихомся яко овча на заколение; спаси люди Своя Боже наш. Ты бо крепость еси немощным, и исправление.
Запев. Море житейское преплавая в корабли телеснем, всяческая содержащаго Христа обрете кормчия всеблаженне. И к Нему радуяся приста, Андрее всечестне.
Запев. Яко волна тихим и кротким духом подвизаемь блаженне, изсушил еси моря лукавая многобожия, божествеными струями. И реки богоразумия всем источил еси.
Слава. Дуси словом отгоняются, недузи бежат. Душевных же страстей множество, далече от недужных отгоняются, данною ти Богом Андрее благодатию.
И ныне. Богородичен. Веселятся о Тебе Дево пречистая рода нашего праотцы, Едема восприемше Тобою, его же преступлением погубиша. Ты бо чиста, прежде рожества и по рожестве еси. Катавасия.
Слава, и ныне. Кондак, глас 2-й. Иже мужеству тезоименитаго богогласника, и церкви поборника, апостола верховнаго, Петрова сродника восхвалим, зане яко же тому древле, и нам ныне взывает, приидите обретохом желаемого.
Икос. Свыше убо Давыд возставляет, грешнаго яко мене, исповедати Божия, богословесно оправдания. Обаче к вере учит паки, и слезами многими исповедати. Днесь бо глас его аще услышите, сердца не ожестите, яко же некогда Израиль, преогорчи. Приносит убо прочее псалма, Господеви вся земля воспойте. Обретохом желаемаго.
Песнь 7. Ирмос
Тебе мысленую Богородице пещь, разсмотряем вернии. Яко же бо отроки спасе три, превозношаемыи, мира обновил есть, во чреве Ти совершен. Восхваляемыи отцем Бог благословеныи.
Запев. Неложно явьствено исполнися обещание Твое Христе. Ибо бури ученик Твой божественыи словом запрещая, на кроткую тишину преложи. В ней погруженыя, яко Петра избавляя.
Запев. На разумную Сиона апостоле, взыти гору повелен. Спасения же прием чашу радуяся наступи преходя смертию, к божественому животу, идеже Христос иже всех Бог, Андрее славне. Тя словесную реку показа, божественая вода живота, прелестныя реки потоки изсушающу блаженне проповедания. И вопиющих напаяющу, хвалимыи отцем Боже благословен еси.
Слава. Ты землен сыи апостоле паче естества чюдодействуеши, любовию бо пременився. Превозносимыи крепость ти непобедимую на духи даде, хвалимыи отцем Бог благословеныи.
И ныне. Богородичен. Тя Ияков Богородице лествицу, пророчески разуме. Тобою бо на земли, превозносимыи явися человеком, и поживе яко же благоизволи, хвалимыи отцем Бог благословеныи. Катавасия.
Песнь 8. Ирмос
В пещи дети Израилевы, яко же в горниле добротою благоверия, чистее злата блещахуся, глаголюще, благословите вся дела Господа, пойте и превозносите Его во веки.
Запев. Светоносная и благорадостная луча целеней, Андрее Христов апостоле, сияющи нам божественая память твоя, вопиющим, вся дела Господня Господа пойте, и превозносите Его во веки.
Запев. Светолучен яко же молния, в свет языком изыде, тму неведения отгоня, и верныя просвещая, зовущих, благословите вся дела Господня Господа, пойте и превозносите Его во веки.
Слава. Человеческое естество прием, того превзыде законы, и ко ангельскому прейде селению Андрее апостоле. Зовыи благословите вся дела Господня Господа, пойте и превозносите Его во веки.
И ныне. Богородичен. Радуися престоле славы Божия. Радуися верным стенд, Ею же свет сущим во тме восия Христос, Тебе блажащим и вопиющим, вся дела Господня, Господа пойте и превозносите Его во веки. Катавасия.
Песнь 9. Ирмос
Образ чистаго рожества Твоего, распалаему купину яви неопалиму. И ныне на нас напастей свирепеющую, угасити молимся пещь. Да Тя Богородице непрестанно величаем.
Запев с поклоном. Яко ученик преугоден, иже на кресте волею распеньшемуся, Владыце Своему даже до смерти последуя. Взыде радуяся и к высоте креста идыи шествием на небеса, блаженне апостоле.
Запев. Дверь Едема тебе отверзеся, предложися лествица небесная, и прияша тя небесныя обители. И предста радуяся апостоле, Христу Жизнодавцу, о мире молитвеник изящен. Равными прославися страстьми учительными, блаженне Андрее всемудре. Крестом бо божественыи конец прият, и причащением Бог был еси. Тем же тя молим, о нас присно молися.
Слава. Радуися двоице всеизрядная, приемша на небесех ныне жительство, назирающа же поющих изволение, самых себе бедящих силою. И божественых даровании просвещаета светлостьми.
И ныне. Богородичен. Ис корене Давыдова прозябе, пророческаго Дево и богоотеческаго. Но и Давыда воистину ты прослави, яко рождьши прорицаемаго Господа славы. Его же поюще величаем. Катавасия.
Отпуст: Господи Исусе Христе, Сыне Божии, молитв ради пречистыя Твоея Матере, и святаго апостола Андрея Первозваннаго, и всех ради святых, помилуй и спаси нас, яко Благ и Человеколюбец. Аминь. Господи помилуй (трижды). Исходные поклоны.
Кондак 1
Первозваннаго апостола Христова, Евангелия Святаго проповедника, Российския страны богодухновеннаго просветителя, Андрея преславнаго, песньми восхвалим, стояще на версе холма, идеже Крест водрузи десница его, и ему, яко Церкве возследователю верховному, вслед себе указавшему ей путь ко Христу, во умилении воззовем:
Радуйся, Андрее, апостоле Христов Первозванный.
Икос 1
Ангел благовестник Агнца Христа, вземлющаго грехи мира, был еси Андрее апостоле, и с Ним во веки пребываеши на Небеси; отонудуже и призри на пения, приносимая тебе во храме твоем, на месте, идеже стоясте нозе твои, и, яко богат сый благодатию Божиею, подаждь нам слово благо, да зовем ти:
Радуйся, деннице от града Вифсаиды нам возсиявшая; радуйся, равночестный брате верховнаго Петра.
Радуйся, учениче великаго Предтечи Христова; радуйся, первее прочих апостол званный ко апостольскому служению от Самаго Господа.
Радуйся, яко и другим с радостию воззвал еси: «Приидите, обретохом желаемаго Мессию»; радуйся, и нас к Нему же приводяй.
Радуйся, Андрее, апостоле Христов Первозванный.
Кондак 2
«Учителю, где живеши?» — вопросил еси, Андрее, Спаса душ наших и, с Ним пребыв день един, возлюбил еси на вся дни живота твоего обретеннаго тобою Мессию, и брата твоего старейшаго привел еси к Нему. Темже и нас, яко меньшую братию твою, к Нему же не престай влещи, да и мы, последующе стопам твоим, вопием Богу: Аллилуиа.
Икос 2
Провидя в тебе, святый Андрее, веры и любве пламень, Господь паки тя обрете на езере Геннисаретсте, яко рыбаря, купно с братом твоим, вметающа мрежи во глубину, и рече вама: «Грядита по Мне, и Аз сотворю вы ловца человеком». Ты же абие последовал еси Ему и богодухновенным словом, яко мрежею, человеки уловил еси Христу, с нимиже и мы, уловленнии тобою во спасение, вещаем ти:
Радуйся, яко от Самаго Господа ловитве духовней научился еси; радуйся, яко на том же езере с прочими апостолы обуреваем быв, верою спаслся еси в Господа, запрещающаго ветром и морю.
Радуйся, стяжавый велию веру, егда видел еси пречудное насыщение пяти тысящ пятию хлебами; радуйся, дар приявый от Господа целити всяк недуг и всяку болезнь.
Радуйся, яко глас с небесе слышан бысть еллином, Христа тобою узревшим; радуйся, яко на горе Елеонстей откровена быша и тебе грядущая при кончине мира.
Радуйся, Андрее, апостоле Христов Первозванный.
Кондак 3
Странствия Владычня и Безсмертныя Трапезы на Горнем месте Сиона насладився, яко верный друг Христов, вкупе с прочими апостолы узрел еси Господа и Бога твоего, от Негоже и Дух Свят приял еси, во еже вязати и решити грехи людския. И паки, в тойжде горнице Сионстей, обильное бысть на тя излияние обетованнаго Духа во огненных языцех. Темже вся племена удивишася, како языком их глаголал еси величия Божия, поя: Аллилуиа.
Икос 3
От Господа заповедь приим проповедати Евангелие всей твари, обтекл еси многия грады и страны, апостоле Андрее, призывая люди к познанию Истиннаго Бога и крестя их во имя Отца и Сына и Святаго Духа; с нимиже и мы сподобихомся благодати Крещения. Сего ради благодарственная восписуем ти:
Радуйся, чудес Христовых провозвестниче верный; радуйся, Святаго Евангелия проповедниче громогласный.
Радуйся, идольскаго служения потребителю; радуйся, истиннаго благочестия насадителю.
Радуйся, яко по слову твоему людие водою и Духом возрождаются; радуйся, яко тобою вернии Безсмертныя Трапезы причащаются.
Радуйся, Андрее, апостоле Христов Первозванный.
Кондак 4
Сила Божия осени тя, апостоле Первозванный, во еже благовестити силу и славу Сына Божия и утверждати вся веровати во Святую Троицу призванныя. Темже убо и нас, покланяющихся Единому в Триех Ипостасех Богу, на злачней пажити веры Христовы соблюди, да благодатию Святаго Духа выну освящаемии, велегласно поем ему: Аллилуиа.
Икос 4
Привед ко Христу брата твоего Симона Петра, Первозванне, с ним изшел еси и на апостольское служение твое, первее во Антиохию и Синоп, и тамо победив демонов полки, от уз темничных спутника твоего апостола Матфия свободил еси, и юзники с ним бывшия крестил, верховному Петру оттуду в западныя страны текущу, ты братнее целование дал еси ему, сам же добре подвизался еси на востоцех. Темже и мы, людие Церкве Восточныя, блажим тя:
Радуйся, сило Божия, полки демонов прогоняющая и узы темниц сокрушающая; радуйся, приятелище благодати апостольския, от адовых уз тайнодейственне нас свобождающия.
Радуйся, запад и восток с братом твоим богомудрым, проповеди ради слова Божия, жребием разделивый; радуйся, во граде Синопе неверие иудеев силою чудес твоих обличивый.
Радуйся, яко тамо от безбожных Христа ради биен был еси; радуйся, яко от Самаго явльшагося ти Господа исцеление язв тебе даровася.
Радуйся, Андрее, апостоле Христов Первозванный.
Кондак 5
Двукраты возвращся во святый град, да купно со апостолы пятидесятый день празднуеши тамо, двукраты паки шествовал еси от святаго Сиона, во еже Христа проповедати вселенней, первее со Иоанном наперсником Господним, посем же с Симоном Кананитом и Матфием, иже жребием назнаменован бысть во апостола, и вся пределы Асии и Понта обтекл еси, словом спасения всех оглашая, да Богу поют: Аллилуиа.
Икос 5
От моря Галилейскаго до Понта Евксинскаго апостольския мрежи твоя распрострый и все поморие окрест огласивый благовестием твоим, востекл еси, Первозванне, и в страны Скифии, Крест Христов всюду водружая в знамение нашего спасения. Сего ради и мы, аще и позднии роди, внемлюще благовестию твоему и воспоминающе подвиги твоя, зовем ти:
Радуйся, в Никеи лютыя разбойники укротивый и лютейшаго дракона умертвивый; радуйся, Крест Христов посреде града сего водрузивый, яко Предтеча сый двукраты собранных тамо отец богоносных.
Радуйся, яко во Асии и Понте тобою свет Христов возсия; радуйся, яко апостольский жезл твой предгорие Кавказа свету Христову отверзе.
Радуйся, имже мрак киммерийский озарися; радуйся, имже вселенная струями воды живы напоися.
Радуйся, Андрее, апостоле Христов Первозванный.
Кондак 6
Бурею страстей одержимая и, яко воды океана, волнуемая, племена человеков, яже не ведяху Бога Истиннаго, привел еси, апостоле, к тихому пристанищу Христову и тех сердца, аки утлую ладию, неверием обуреваемая, на якори веры православныя утвердил еси. Темже и мы, яко чада православныя веры, благодарным сердцем и благодарными усты вопием Богу: Аллилуиа.
Икос 6
На горе Елеонстей Божественнаго Учителя твоего иногда со прочими апостолы вопросил еси, Андрее: «Рцы нам, что есть знамение пришествия Твоего?» На горах же Киевских, яко орган сый благодати Духа Святаго, ты предвозвестил еси грядущую славу места сего; мы же, предреченныя нам милости сея сподобльшеся, умиленно взываем ти:
Радуйся, яко с горы Сиона закон нам евангельский принесл еси; радуйся, яко по водам Ворисфена апостол Божий к нам востекл еси.
Радуйся, благодать Иорданову, Крещения нашего ради, реце сей даровавый; радуйся, на горах Киевских Крест нашего спасения водрузивый.
Радуйся, имже обильное излияние благодати Божией зде предречеся; радуйся, имже бытие града велика и церквей многих зде предвозвестися.
Радуйся, Андрее, апостоле Христов Первозванный.
Кондак 7
Днесь, во исполнение пророческаго гласа твоего, храм преславный красуется на месте, идеже не сущая яко сущая провидел еси по дару Духа Святаго; окрест же его град велий с церквами златоверхими истину словес твоих свидетельствует, емуже и доныне ты, яко с горния кафедры, мир благовествуеши. Темже и мы, сбытие богодухновенных глагол твоих зряще, велиим гласом взываем Богу: Аллилуиа.
Икос 7
От светоносныя зари, Первозваннаго апостола, свет боговедения восприимши, святая Ольга возсия Российстей земли, яко денница нашего спасения, возводя вслед себе, яко светозарное светило, внука своего Владимира, просветителя всея полунощныя страны. Темже и мы, возведше очи наша к тебе, Андрее богомудре, яко к начальному благовестнику нашего спасения, восписуем ти похвальная сия:
Радуйся, яко деннице нашего спасения, Ольге святей, света Божественнаго познание даровася; радуйся, яко благоверию ея Христово Царствие отверзеся.
Радуйся, яко благословением твоим преславное светило от сея денницы нам произыде; радуйся, яко по твоему предвозвестию апостольскому равноапостольный князь нам явися.
Радуйся, яко тобою святаго Владимира царствие земное к Небесному приобщися; радуйся, яко Днепр и Почайна, реки киевския, спасительною купелию нам быша.
Радуйся, Андрее, апостоле Христов Первозванный.
Кондак 8
Проповедуют преславнаго града Киева и всея Российския страны пастырие и пасомии память деяний твоих, богомудре Андрее апостоле; в недрах же пещерных нетленно почивающии угодницы Божии, со Антонием и Феодосием, немолчными усты, яко живи суще, славу твою веком и родом возглашают, тобою бо водруженный зде Крест, яко благосеннолиственное древо, произрасте, во еже изнести нам плоды благочестия и святыни. Мы же райскаго вертограда твоего, аки птенцы духовнии, тобою научени есмы воспевати Богу: Аллилуиа.
Икос 8
Не точию Руси единыя был еси спасения провозвестник, Первозванный апостоле Христов, но и вся словенская племена, якоже кокош, птенцы своя под криле собираяй, привел еси я ко Христу; ты бо от Херсониса во мрак полунощныя страны прозирая, сущим тамо людем, да Божию научатся слову, премудрыя учители, Кирилла и Мефодия, проповедию твоею за многия веки предуготовал еси; мы же, аки устами сих просветителей наших, велегласно вопием ти:
Радуйся, словенская племена искони благословивый; радуйся, слово их разумное словом Божиим умудривый.
Радуйся, яко глаголу Божию послушливии, Церкве чада словесная быша; радуйся, яко в Херсонисе, идеже проповедал еси, первая росская писмена Кирилл святый обрете и прият я.
Радуйся, яко теми Алфу и Омегу, начаток и конец — Христа Божию премудрость возвестил еси им; радуйся, яко и вся богодухновенная писания учителие сии на язык словенск нам преложиша.
Радуйся, Андрее, апостоле Христов Первозванный.
Кондак 9
Пустынныя Скифии не убоявся, во глубину полунощныя страны простерл еси апостольская странствия твоя, Первозванне, отонудуже и в ветхий Рим пришел еси, иже тогда глава миру языческому бысть; обаче тьмы ради идольския оставль его, и на красный брег Воспора пришед, тамо во граде Византии, иже новый Рим и матерь христианом бысть, апостольский престол твой утвердил еси, да от него Восток и Север весь светом веры озарится, вернии же чада Церкве Христовы Богу единомысленно воззовут: Аллилуиа.
Икос 9
«Мати Сион»,— псаломски речет человек, яко человек духовно родися в нем, новый же Сион нам бысть Киев: в нем бо свет и благодать Божия явися всем сыновом российстим от кафедры, юже ты, Первозванне апостоле, в Византии утвердил еси. Темже и мы, Невечерним Светом озаряемии, благодарно взываем ти:
Радуйся, от горы Сионския снизшедый и горним светом Киев многохолмный озаривый; радуйся, граду сему многоплодие духовное благословением твоим низпославый.
Радуйся, яко посреде вселенныя апостольский престол твой утвердил еси; радуйся, яко под сень его (в новом Риме) вся просвещенныя тобою языки собрал еси.
Радуйся, имже православие в душах их утверждается; радуйся, имже от Востока тьма Запада отревается.
Радуйся, Андрее, апостоле Христов Первозванный.
Кондак 10
Егда наста время преставления твоего, блаженне апостоле, в древния Патры Ахайския пришел еси, да тамо жрен будеши, течение бо скончал еси, подвигом добрым подвизался еси, всем проповедав Христа распята, иудеем соблазн, еллином же безумие, нам же, званным и спасаемым,— Христа, Божию Силу и Божию Премудрость, от Неяже и научихомся пети Богу: Аллилуиа.
Икос 10
Всюду Именем Господа Иисуса болящия исцеляя, мертвыя воскрешая, бесы изгоняя, и во Патрах предсмертную проповедь твою чудесами утвердил еси, апостоле Христов, и анфипата Лезвия обратил еси к познанию истины, егда противления ради язвою поражен быв, тобою от одра болезни воздвижен бысть; людие же вси, видевше в тебе силу Божию, идолы своя сокрушиша, посем и Господь явися тебе, якоже Павлу иногда в Коринфе, и повеле взяти крест твой, назнаменовав сим твое в Патрах, Его ради, страдание. Темже и мы, дивящеся велией благодати в тебе, благоговейно взываем:
Радуйся, велия Бога всемогущаго сило; радуйся, многоценное чудес сокровище.
Радуйся, древних Патр просвещение и украшение; радуйся, неверие анфипата в веру пременивый.
Радуйся, яко тамо паки явися тебе Господь, на подвиг крестный тя призвавый; радуйся, яко уготовася тебе венец правды.
Радуйся, Андрее, апостоле Христов Первозванный.
Кондак 11
Нерон кесарь, якоже иногда Ирод, гонение на вся верныя воздвигнувый, в Риме Павла мечем усекну, Петра же на кресте распя, подобне и тебе достиже в Патрах рука мучителева, егда вместо кроткаго Лезвия судию постави Егеата лютаго, иже не терпяй крещения брата своего, ниже исцелением жены своея умягчен быв, в темницу вверже тя и, якоже верховнаго Петра, на крест осуди. Ты же юзник сый, в темнице мрачней, яко во светлом храме, брата анфипатова Стратоклиса во епископа Патром проручествовал еси, Богу со всеми верными посреде узилища воспевая: Аллилуиа.
Икос 11
На месте лобнем крест воздвизаем узрев, на немже имел еси распят быти, не убоялся еси, апостоле, даже до смерти свидетельствовати возлюбльшаго тя и возлюбленнаго тобою Христа, и к сему знамению спасения руце простирая, умиленно взывал еси:
Радуйся, Кресте Всечестный, пред нимже с веселием предстою, ведая тя, упование мое; радуйся, Кресте Животворящий, егоже глава до Небес достиже, подножие же врата ада сокруши.
Радуйся, Кресте достопокланяемый, восприемый Владыку моего, яко гроздие сладчайшее, источившее нам спасение; радуйся, Кресте благословенный, разбойника спасый и тому плоды исповедания даровавый.
Радуйся, яко и моея радости исполнение был еси; темже радуйся и ты, страстотерпче, на Кресте веру твою во Христа запечатлевый.
Радуйся, Андрее, апостоле Христов Первозванный.
Кондак 12
«Приидите, свидетелие радости моея! — воззвал еси апостоле к совершителем воли Егеата,— творите волю наю обою, распните мя и, яко агнца, принесите в жертву создавшему мя Творцу». И сия рек, возшел еси на крест, яко на горнюю кафедру, с неяже три дни и три нощи проповедал еси слово Божие окрест стоящим людем, да не боятся смерти, исповедающе Господа Иисуса. Егда же светом Небесным озарися лик твой, ужасеся мучитель и тя со креста взяти повеле; обаче ты, страстотерпче, не восхотел еси от крестных мук разрешитися, до исхода твоего непрестанно Богу вопия: Аллилуиа.
Икос 12
Славяще апостольския подвиги твоя, Андрее Первозванне, ублажаем святую кончину твою, еюже Живоносную Страсть Сына Божия прославил еси, и во умилении сердца взываем ти сице:
Радуйся, друже Христов, с радостию крестная страдания за Него претерпевый; радуйся, апостоле верный, со креста глаголы Живота Вечнаго людем проповедавый.
Радуйся, яко в час снятия со креста осени тя свет, аки молния с небесе; радуйся, яко православно исповедающим проповеданнаго тобою Христа Сына Божия обещал еси благодать велию.
Радуйся, Горняго Иерусалима апостольское основание; радуйся, седяй со апостолы на едином от двоюнадесяте престолов, во еже судити вся колена Израилева.
Радуйся, Андрее, апостоле Христов Первозванный.
Кондак 13
О Первозванный апостоле Христов Андрее, призри на благохваления сия всех чтущих святую память твою, и яко водрузил еси Крестное Древо на горах града Киева, присно осеняй и нас спасительным знамением сим, да, Крестом Господа Бога и Спаса нашего охраняеми, достигнем в меру возраста исполнения Христова и сподобимся с тобою и со всеми святыми, во гласе радования, в безконечныя веки пети Богу, Спасителю нашему: Аллилуиа.
Этот кондак читается трижды, затем 1-й икос «Ангел благовестник…» и 1-й кондак «Первозваннаго апостола…».