Содержание
МОЛИТВЫ О МИРЕ В УКРАИНЕ
МОЛИТВА О МИРЕ В УКРАИНЕ
Владыко Вседержителю, Святый Царю. Призри с небесе и виждь, како враждуют людие земли нашея и замышляют друг на друга суетное и злобное. О, Многомилостиве! Прости грехи и беззакония наша, ихже ради многия скорби, беды и устрашения приидоша на ны. Благодатию Пресвятаго Духа ороси любовию изсохшия сердца людския, тернием самолюбия, ненависти, зависти, злобы, вражды, лукавства и иных беззаконий поросшия, да возрастят горящую к Тебе и братиям своим любовь, и ею да будут истреблены вси распри, раздоры, разделения во Отечестве нашем.
Усердно молим Тя: мир державе нашей даруй, Церкви Твоей и всем людем земли нашея. Ты бо еси Царь мира и мира Твоего несть предела и Тебе слава и благодарение и поклонение от всех да возсылается, ныне и присно и во веки веков.
МОЛИТВА ЗА ОТЕЧЕСТВО
О, Святы́й Влады́ко и Го́споди, Сокро́вище благи́х и жи́зни Пода́телю, Тво́рче не́ба и земли́, ви́димым же всем и неви́димым! При́зри ми́лостивно на лю́ди оте́чества на́шего, ко́их от лет дре́вних в днепро́вских вода́х сотвори́л еси́ в достоя́ние Себе́ Еди́ному И́стинному Бо́гу и Влады́це, явля́я наро́д свят, во благоче́стии и и́стенней ве́ре воспита́н, прине́сший Тебе́ досто́ин пло́д святы́х твои́х многразли́чными по́двигами жития́ своего́ на земли́ сей Твое́ Трисвято́е И́мя просла́вивших и ны́не с го́рними си́лами на небеси́ ту́южде хвалу́ Тебе́ принося́щих. Ве́мы, Царю́ Святы́й, яко дре́вний Изра́иль, мно́гажды любо́вь Твою́ преогорча́л еси́ и от того́ мно́гими скорбми́ обреме́н был еси́. Но и ны́не не оста́ви наро́ды украи́нския держа́вы на́шея в ско́рби и обстоя́нии бы́ти и расхища́емы от ра́спрей же и междуусо́бий, но все́х соедини́ у́зами любве́ твоея́; Обнови́ в серца́х на́ших бо́льшую за́поведь твою́, е́же люби́те Тебе́ Еди́ного И́стинного Бо́га и бли́жнего своего́ я́ко сам себе́, пошли́ лю́дем оте́чества на́шего ду́ха и́стиннаго покая́ния и стра́хом твои́м святы́м их огради́, да тем ми́лость твою́ улуча́т и поживу́т в ми́ре и благоде́нствии, прославля́я твое́ человеколю́бие и велича́я твое́ Пресвято́е И́мя Отца́ и Сы́на и Свята́го Ду́ха всегда́ ны́не и при́сно и во ве́ки веко́в. Ами́нь!
МОЛИТВА О СВЯТЕЙ ЦЕРКВИ И ОТЕЧЕСТВЕ
В ГОДИНУ ИСПЫТАНИЙ
Господи Боже наш, великий и многомилостивый!
Во умилении сердец наших смиренно молимся Тебе: сохрани под кровом Твоея благости от всякаго злаго обстояния Святую Церковь Твою, Отечество наше Украину и нас, в скорби сущих, верных чад Ея.
Даруй властем страны нашея мудрость, всади в сердца их страх Твой и совесть христианскую, да Тебе Господа Бога боятся и людей стыдятся и да право правят народом и благая о Церкви Твоей да помышляют.
Подаждь скорое примирение людем Твоим, ихже честною Твоею кровию искупил еси. Благодатию Пресвятаго Духа исполни любовию иссохшия сердца людския, да возрастет в них пламенеющая к Тебе и братиям и сестрам своим любовь, и ею да будут побеждены и прекратятся в стране нашей ненависть, зависть, лукавство, злоба, распри, раздоры, враждования, разделения и иныя беззакония.
Отступившим от Тебе и Тебе не ищущим явлен буди, во еже ни единому от них погибнути, но всем спастися и в разум истины приити.
Сохрани нас, Господи, от нападений бесовских, искушений злых человек. Исполни нас долготою дний и крепостию сил, да в мире, тишине и благочестии поживем, совершая вся во славу Твою, благо Святыя Церкве Твоея и на пользу Отечества нашего. Мы же, всеблагому промышлению Твоему о нас радующееся, на всяк день и час благословим и прославим Всесвятое имя Твое, Отца и Сына и Святаго Духа. Аминь.
* * *
ОСОБЫЕ ПРОШЕНИЯ
Прошение на сугубой ектении
Еще молимся Господу Богу нашему о еже вси распри, раздоры, разделения, вражду и злобу всеконечно в державе нашей истребити, тишину же народу нашему даровати и миром вожделенным нас оградити, рцем вси: Господи, услыши и милостивно помилуй.
О еже милостивым оком призрети на люди земли Украинския и сотворити ю непреобориму от распри творящих, молим Тя, Милосердый Господи, услыши и помилуй.
О еже просветити светом Своего богоразумия мысли ожесточением помраченных, верных же Своих в стране Украинстей укрепити и невредимых соблюсти, молим Тя, Всесильный Творче, услыши и помилуй.
Давый заповедь Твою нам, еже любити Тебе Бога нашего и ближняго своего, сотвори, да ненависти, вражды, обиды, мздоимства, кровопролития и прочая беззакония прекратятся, истинная же любовь да царствует в людех земли украинския, молим Ти ся, Спасителю наш, услыши и милостивно помилуй.
В обращении к Полноте Русской Православной Церкви Святейший Патриарх Московский и всея Руси Кирилл
благословил во всех храмах совершать особую молитву о мире и преодолении междоусобной брани на Украине.
Молитва о прекращении междоусобныя брани на Божественной литургии по сугубой ектении чтомая
Господи Иисусе Христе Боже наш, призри милостивным Твоим оком на скорбь и многоболезненный вопль чад Твоих, в земле украинстей сущих.
Избави люди Твоя от междоусобныя брани, утоли кровопролития, отврати належащия беды. Лишенныя крова введи в домы, алчущия напитай, плачущия утеши, разделенныя совокупи.
Не остави стадо Свое, от сродник своих во озлоблении сущих, умалитися, но скорое примирение яко щедр даруй. Ожесточенных сердца умягчи и к Твоему познанию обрати. Мир Церкви Твоей и верным чадам ея подаждь, да единем сердцем и едиными усты прославим Тя, Господа и Спасителя нашего во веки веков. Аминь.
Прошение на заупокойной ектении
Еще молимся о упокоении душ усопших рабов Божиих в братоубийственной смуте на Украине убиенных и о еже проститися им всякому прегрешению, вольному же и невольному.
Просмотры (9524)
Эта запись также доступна на: Украинский