Содержание
Молитвы и акафист Богородице перед Ее иконой Спорительница хлебов
Тропарь и кондак
Молитва Богородице перед Ее иконой Спорительница хлебов
Акафист Богородице перед Ее иконой Спорительница хлебов
Величание
ТРОПАРЬ И КОНДАК БОГОРОДИЦЕ ПЕРЕД ИКОНОЙ ЕЕ СПОРИТЕЛЬНИЦА ХЛЕБОВ
Тропарь, глас 3
Пречистая Дево Марие, Мати Царя небеси и земли, благоутробно призираеши на любящих Сына Твоего, Христа Бога нашего, и труждающихся во имя Его вечнаго ради спасения, и подаеши им вся обильно к наслаждению. Спорительнице сущи хлебов им, избавляя их всякия нужды и утеснения, и устрояя им, рабом Твоим сущим, избавление вечныя муки и жизнь вечную.
Кондак, глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву, и потщися на умоление, предстательствующи присно, Богородице, чтущих Тя.
МОЛИТВА К ПРЕСВЯТОЙ БОГОРОДИЦЕ ПЕРЕД ЕЯ ИКОНОЙ СПОРИТЕЛЬНИЦА ХЛЕБОВ
О, Пресвятая Дево Богородице, Премилостивая Владычице, Царице Небесе и земли, всякаго дома и семейства христианскаго Благоустроительнице, труждающихся благословение, нуждающихся неистощимое богатство, сирых и вдовиц и всех людей Кормительнице! Питательнице наша, рождшая Питателя Вселенныя и Спорительнице хлебов наших, Ты, Владычице, ниспосылаеши Твое Матернее благословение градом нашим, селам и нивам и коемуждо дому, на Тя упование имущему. Темже с благоговейным трепетом и сокрушенным сердцем смиренно молим Тя: буди и нам, грешным и недостойным рабом Твоим, мудрая Домостроительнице, житие наше добре устрояющая. Всякое же сообщество, всякий дом и семейство во благочестии и православии, единомыслии, послушании и довольстве соблюди. Нищия и неимущия пропитай, старость поддержи, младенцы воспитай, всех вразуми преискренне взывати ко Господу: «Хлеб наш насущный даждь нам днесь». Сохрани, Пречистая Мати, люди Твоя от всякия нужды, болезни, глада, губительства, града, огня, от всякаго злаго обстояния и всякаго нестроения. Обители нашей (веси), домам и семействам и всякой души христианстей и всей стране нашей исходатайствуй мир и велию милость, да славим Тя, Премилостивую Питательницу и Кормительницу нашу, ныне и присно, и во веки веков. Аминь.
АКАФИСТ К ПРЕСВЯТОЙ БОГОРОДИЦЕ ПЕРЕД ЕЯ ИКОНОЙ СПОРИТЕЛЬНИЦА ХЛЕБОВ
Как правильно читать акафист
Кондак 1
Избранней от всех родов Божией Матери и Владычице Небеси и земли, избавляющей нас от всякия нужды, благодарственное приносим пение. Ты же, Всемилостивая Госпоже Богородице, приими наше усердное моление, сохрани нас от глада и пагубы, даруй земли нашей плодоносие, Питательнице и Спорительнице нив и хлебов наших, да радующеся всегда зовем Ти: Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.
Икос 1
Ангелов Творец избра Тя, Владычице, к благодатному человеков спасению и дарова Тя Помощницу людем, избавляющую нас от глада и всяких напастей, житие наше добре устрояющую во всяком мире и довольстве. Темже со умилением взываем Ти:
Радуйся, благодатное человеков избавление от всякия нужды;
Радуйся, достоянию Твоему помощь и заступление.
Радуйся, христолюбивыя люди от бед спасающая;
Радуйся, алчущих Питательнице.
Радуйся, сирых Заступнице;
Радуйся, нагих одеяние.
Радуйся, израстившая нам Плод Живота;
Радуйся, Спаса рождшая душ наших.
Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.
Кондак 2
Видев Сын Твой, Богомати, великое Твое к людем милосердие, глаголет к Тебе: «Проси, Мати Моя, зане не отвращуся Тебе, но исполню вся прошения Твоя». Мы же, прославляющие сие дивное промышление о роде человеческом, вопием Богу: Аллилуиа.
Икос 2
Разум небесный даровася благочестивому старцу Амвросию, настави его соорудити во обители им созданной, икону Пресвятыя Богородицы и нарещи ю «Спорительнице хлебов», яко Ты, Пресвятая Дево, спасаеши люди Твоя от глада, даруеши земли плодоносие, посылаеши дождь ранний и поздний на нивы и поля наша, защищаеши люди Твоя от смертоноснаго вреда и пагубы. Темже вопием Тебе таковая:
Радуйся, Дево, христиан похвало;
Радуйся, яко Тя блажат вси роди.
Радуйся, яко Ты благословляеши и споряеши хлебы наша;
Радуйся, яко Ты избавляеши нас от глада.
Радуйся, питающая нас хлебом жизни;
Радуйся, млеком питавшы Питателя Вселенныя.
Радуйся, Плода Безсмертнаго стяжание;
Радуйся, Садителя жизни нашея родшая.
Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.
Кондак 3
Силою свыше укрепи нас, Благодатная Владычице, во дни глада и пагубы, да не погибнем люте без покаяния во унынии и отчаянии, но утверди и настави нас в терпении и благоугождении Богу, да разумеем в напастех и скорбех волю Его святую, благую и совершенную, непрестанно хваля Бога и взывая Ему: Аллилуиа.
Икос 3
Имея любовь велию к людям, искупленным Честною Кровию Сына Твоего и Бога, Богомати Пречистыя, прияла еси от Него власть устрояти и покрывати род христианский. Ты бо бедствующим Помощнице еси скорая, градом и весем, селам и нивам, и всему миру Покров. Тебе, Милосердной и Боголюбивой Матери нашей, устрояющей и управляющей ко спасению земную жизнь нашу, смиренномудренно глаголем:
Радуйся, Благаго Сына Благая Мати;
Радуйся, непрестанно молящаяся о спасении и помиловании нас грешных.
Радуйся, о всем мире христианстем к Богу Ходатаице;
Радуйся, благ всяческих Всеблагая Подательнице.
Радуйся, плененных и в темницех заключенных Питательнице;
Радуйся, тела моего здравие и души моея спасение.
Радуйся, яко рай пищный процветаеши;
Радуйся, яко пристанище душам готовиши.
Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.
Кондак 4
Буря противных ветров, егда найдет на нас внезапно, громы и молнии, град и вода многая устремится на землю, тогда, Госпоже Всемилостивая, ускори на помощь нам безпомощным, защити и избави нас от дождевнаго лияния, егоже сотворихомся достойни грех ради наших, и да будут поля и нивы невредимы от сих, и да не потопит нас буря водная. Тебе бо грешнии имамы Заступницу непостыдную, на Тя упование наше возлагаем и, прославляюше силу молитв Твоих, Рождшемуся от Тебе Спасу мира зовем: Аллилуиа.
Икос 4
Слышаще и видяще Твое сострадание, Владычице, к бедствующим и гибнущим людем, мы, грешнии, прибегаем к Тебе и молимся: О, Пресвятая Дево, услыши нас грешных, и во дни, егда солнце изсушит землю и от сухости зной будет, и прозябения земная начнут увядати, тогда Владычице, росу благодати Твоея низпосли на требующия и просящия милости, возвесели лице земли, нищих ради людей Твоих, младенец, и скотов, и иных всех, иже чают дати им пищу во благо время, и от святыя иконы Твоея «Спорительницы» яви милосердие Твое вопиющим Тебе таковая:
Радуйся, Молитвеннице неусыпающая ко Христу Богу, на милость к нам Его преклоняющая;
Радуйся, кару Божию за беззакония наша от глав наших отводящая.
Радуйся, Матерним покровом Твоим от всяких несчастий нас охраняющая;
Радуйся, поля и нивы наша от запаления солнечнаго спасающая.
Радуйся, Всемилостивая Услышательнице гласов наших молебных в скорби и обстоянии;
Радуйся, жилища наша от огня спасающая.
Радуйся, Державная Скоропомощнице наша во дни тяжких испытаний;
Радуйся, от всех бед быстрое избавление.
Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое..
Кондак 5
Боготечная звезда, икона Твоя, Богомати, людем, просящим хлеба насущнаго, немерцаемо сияет, покровом бо Твоея милости соблюдаеши поля и нивы наша и плодоносити их устрояеши, подвизая верныя вопити Христу Богу: Аллилуиа.
Икос 5
Видя Тя Сын Твой при Кресте стоящую с возлюбленным учеником, глаголет Тебе: «Жено, се Сын Твой» и ученику: «Се Мати Твоя!» — всыновляя Тебе вся верующия в Него. Мы же, чада Твоя сущия, на Твой покров надеющеся, Тебе, яко Матери нашей, глаголати дерзаем:
Радуйся, Судии Праведнаго умоление;
Радуйся, грехов наших прощение.
Радуйся, Надеждо наша известная;
радуйся, упование наше непостыдное.
Радуйся, скорбей наших разрешение;
Радуйся, печалей наших утоление.
Радуйся, пламене страстей изменяющая;
Радуйся, всех родов веселие.
Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.
Кондак 6
Проповедует Церковь Христова чудеса Твоя, Богородительнице, от восток бо до запад хвально Имя Твое, и несть града или страны, идеже не совершашеся Тобою действо Силы Божия, во избавление и спасение, просвещение и исцеление людей христоименитых, наипаче же чрез иконы Твоя святыя обыкла еси чудотворити, изливающи от них струи милостей и щедрот бедствующему и требующему помощи человечеству. Сего ради славословяще Тя, Сыну Твоему и Богу нашему вопием: Аллилуиа.
Икос 6
Возсияла еси от Истиннаго Солнца заря, Дево Богоотроковице, просвещаеши души всех, томимых гладом душевным, рече бо Господь: «Не о хлебе едином жив будет человек, но о всяком глаголе, исходящем из уст Божиих». Но помрачишася очи наша и окаменеша сердца наша, и не видим очима своима и не разумеем сердцем судеб Божиих. Томимыя душевным гладом, к Тебе прибегаем, Пречистая Дево, и просим Словом Жизни утолить глад душевный нас, вопиющих Тебе таковая:
Радуйся, от убожества душевнаго нас воздвизающая;
Радуйся, Питающая нас Словом Жизни.
Радуйся, трапезо Пресвятая, Хлеб Жизни носившая;
Радуйся, Пище, манны приемнице.
Радуйся, земле Благая, Клас божественный израстившая;
Радуйся, ниво, растящая многоплодие щедрот.
Радуйся, каменю напоивший жаждущия жизни;
Радуйся, милость сугубо нам подающая.
Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.
Кондак 7
Хотящи жати спасение, яко село сладкое показалася еси Владычице, от Негоже питающеся, имамы пищу вечную и нетленную. Мы же, земнии суще, молим Тя, Пречистая Дево, покажи силу Твою на жатве нив и полей наших, егда приидет время их, и всяк злак да изобилует на утешение нас, поющих Богу: Аллилуиа.
Икос 7
Дивно прославилася еси, Богомати, в защищении людей православных. Возстающии бо на Бога не познают, коль сильна есть молитва Божией Матери. Мы же о Твоем всемощном заступлении, помощи и благословении добре ведуще, сице к Тебе со умилением зовем:
Радуйся, чистых руками и сердцем земледельцев благословенными плодами венчающая;
Радуйся, бедствующим среди напастей и трудов внезапное вспоможение.
Радуйся, безматерних сирот незримая Воспитательнице;
Радуйся, Помощнице всех безпомощных.
Радуйся, Кормительнице вдов и сирот;
Радуйся, подающая силу, пищу и отраду болящим и разслабленным.
Радуйся, одеждо нагих дерзновения;
Радуйся, многих согрешений прощение.
Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.
Кондак 8
Якоже древле содействовала еси схождению на землю Спасителя мира, сице и ныне, яко солнце светозарное, восходиши над созревающей нивой, предшествуя приходу Господина с Жателями. Тому и мы со страхом вопием: Аллилуиа.
Икос 8
Все упование наше на Тя возлагаем, Мати Божия, и в скорбех наших ко святей иконе Твоей «Спорительнице» усердно притекаем, чающе получити от Тебе утешение благодатное и вспоможение во оскудении и нищете нашей, взываем Ти:
Радуйся, милости превеликия сокровище;
Радуйся, пище и утешение к Тебе прибегающих.
Радуйся, хлебе неснедаемый алчущих;
Радуйся, быстрое нищих услышание.
Радуйся, скорбящих от глада и нужды приятное попечение;
Радуйся, к Свету Неприступному нас извлачающая.
Радуйся, ключу Царствия Христова;
Радуйся, Надеждо благ вечных.
Радуйся, Благодатная, Господь с Тобою, подаждь и нам недостойным, росу благодати Твоея и яви милосердие Твое.
Кондак 9
Вси людие дивятся величию чудес Твоих, Пресвятая Дево, изливаемых Тобою от святых Твоих икон, яко всем даруеши по коемуждо прошению, устрояеши домы наша, посылаеши благословение земледельцем и даеши людем всякое довольство. Темже вопием Сыну Твоему: Аллилуиа.
Икос 9
Вития многовещанныя не могут воспети чудес Твоих, Богомати Владычице, яко всем концем земли простираеши руку помощи и ниспосылаеши верным земли плодоносие, благорастворение воздухов и всякое изобилие плодов и благ земных. Мы же во смирении своем исповедающе Твое великое заступление о нас грешных и непрестанную помощь в нуждах наших вопием Ти:
Радуйся, достойно восхваляемая от Архангел и Ангел;
Радуйся, величаемая от всех Небесных Сил.
Радуйся, Честнейшая Херувим;
Радуйся, Славнейшая без сравнения Серафим.
Радуйся, Владычице Неба и земли;
Радуйся, Родительнице Вечнаго Царя.
Радуйся, верная Рабо Господня;
Радуйся, ублажаемая на Небеси и на земли.
Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.
Кондак 10
Спасительное прибежище в скорбех и напастех Ты еси, Богородице, темже испроси у Сына Твоего и Бога нашего, милости нам грешным, поющим: Аллилуиа.
Икос 10
Стена еси похваляющим чудеса Твоя, Богородице Дево, и всем с верою притекающим и поклоняющимся Тебе и иконе Твоей «Спорительнице хлебов» именуемой и глаголющим: Радуйся, неистощимый источниче милостей и щедрот;
Радуйся, любве Божественных проявление.
Радуйся, чудес преславных совершение;
Радуйся, труждающихся и обремененных сладкий покое.
Радуйся, терпеливых страдальцев дарами благодатными ущедряющая;
Радуйся, о храмех Божиих попечение имущих духовною радостию утешающая.
Радуйся, несумненная наша Надеждо;
Радуйся, тихое и доброе Пристанище.
Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.
Кондак 11
Пение наше не презри, Пресвятая Дево, и сокровище любве Твоея не затвори от нас; щедрую руку Твоея помощи простри нам, да прославляющи милости и чудеса Твоя, поем Триединому Богу: Аллилуиа.
Икос 11
Светлыми лучами чудес Твоих просвещаеши весь мир христианский и заступаеши люди православныя, искупленным кровию Сына Твоего, темже припадающе ко святому образу Твоему, на немже зрим Тя, Богомати, на воздусе над полями и нивами нашими благословляющую собранныя снопы хлеба, молим Тя, Всемилостивая Владычице, род человеческий, осужденный в поте лица снести хлеб, в болезнех родити и в печалех питати чада своя, милостивно пощади и заступи. Даруй нам здравие и благомощие, да питаемии Тобою, от силы в силу возрастати будем и вси исполнимся радости и утешения от щедродательныя десницы любве Твоея, зовуще Тебе:
Радуйся, младенцев Млекопитательнице;
Радуйся, устнами детей хвалу Богови совершающая.
Радуйся, Росо Неботочная в зной трудов сущим;
Радуйся, подавающая требующим благоустроение.
Радуйся, уготовляющая просящим изобилие;
Радуйся, многажды прошения предваряющая.
Радуйся, печальных Утешение; радуйся, скорбящих веселие.
Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.
Кондак 12
Благодатную помощь ниспосли нам, Мати Божия, и егда изыдет сеяй сеяти, да не падут семена при пути или посреде терния, или на камени, но на земли добрей. Сотвори восход их, да произрастит земля плод сторицею, и мы вси в радости сердца благодарными устны вопием Богу: Аллилуиа.
Икос 12
Поюще чудеса Твоя и милости, Владычице Богородице, хвалим Тя вси, яко воистину еси наша Помощнице, Заступнице, Питательнице и Домостроительнице, житие наше ко спасению устрояющая. Темже вопием Ти:
Радуйся, богатство нетленное нам подавающая;
Радуйся, брашно негиблющее алчущим правды.
Радуйся, питие неисчерпаемое жаждущим жизни;
Радуйся, яко рай пищный процветаеши.
Радуйся, верных спасительное прибежище;
Радуйся, Покрове миру ширший облака.
Радуйся, ненадежных надеяние;
Радуйся, отчаянных спасение.
Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.
Кондак 13
О, Всепетая Мати, рождшая всех святых Святейшее Слово! Нынешнее наше приемши приношение, избави люди, к Тебе прибегающия, от всякия нужды, глада душевнаго и телеснаго, смертоносных болезней и всякаго зла и вечныя изми муки, да с лики ангельскими непрестанно поем Богу: Аллилуиа.
(Этот кондак читается трижды, затем икос 1 и кондак 1)
Икос 1
Ангелов Творец избра Тя, Владычице, к благодатному человеков спасению и дарова Тя Помощницу людем, избавляющую нас от глада и всяких напастей, житие наше добре устрояющую во всяком мире и довольстве. Темже со умилением взываем Ти:
Радуйся, благодатное человеков избавление от всякия нужды;
Радуйся, достоянию Твоему помощь и заступление.
Радуйся, христолюбивыя люди от бед спасающая;
Радуйся, алчущих Питательнице.
Радуйся, сирых Заступнице;
Радуйся, нагих одеяние.
Радуйся, израстившая нам Плод Живота;
Радуйся, Спаса рождшая душ наших.
Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.
Кондак 1
Избранней от всех родов Божией Матери и Владычице Небеси и земли, избавляющей нас от всякия нужды, благодарственное приносим пение. Ты же, Всемилостивая Госпоже Богородице, приими наше усердное моление, сохрани нас от глада и пагубы, даруй земли нашей плодоносие, Питательнице и Спорительнице нив и хлебов наших, да радующеся всегда зовем Ти: Радуйся, Благодатная, Господь с Тобою, подаждь и нам, недостойным, росу благодати Твоея и яви милосердие Твое.
Редкие Богослужебные тексты
СЛУЖБА
ИКОНЕ БОЖИЕЙ МАТЕРИ
ИМЕНУЕМОЙ «СПОРИТЕЛЬНИЦА ХЛЕБОВ»
НА МАЛОЙ ВЕЧЕРНИ
стихиры Богородице глас 4:
Приидите, вси нищии, алчущии душею, притецыте вси, се бо Небеснаго Хлеба Чертог на облаце предгрядет, обвеселяя народы православныя, исполняя во благих желания всех и насыщая млеком и медом земли обетованныя.
Насыщаеми Тобою, Богородительнице, гласы хвалебныя Тебе приносим днесь, не имамы бо иныя Предстательницы, ни иныя кормительницы, ни иныя Матере любвеобильныя, токмо Тебе, Владычице, яко милуеши присно род христианский.
Хлеба Небеснаго Трапезо таинственная, манны древнеизраильския скиние Божественная, Жезле, прозябший Цвет нетления, новозаветная Чаше спасения, оныя Небесныя сладости причастники соделай ны, Дево Спорительнице.
Слава и ныне: глас 5
Возвеселися, обителе Оптинская, украсися и пой, яко духовная нива твоя угобзися и поля твоя исполнишася тука, Матерь бо Света Спорительницу хлебов в себе имаши; темже не взалчут, ни возопиют чада твоя, православно Ту исповедающии, яко Матеродеву Богородительницу чистую.
Стихиры на стиховне глас 2
подобен: дом Ефрафов:
Житнице Слова, спасения Ходатаице, нивы душевныя, Дево Спорительнице, Твоя рабы сохрани плевелопожжения.
Стих: Приведутся девы в след Ея, искрении приведутся Тебе
Скиния верных собрания Ты еси, Перчистая, новаго Израиля Долина, на Нейже крины девства цветут, благовонствующе чистотою.
Стих: Предста Царица одесную Тебе.
Хлеб насущный подаждь рабом Твоим, на нивах труждающимся, и всякаго вреда стадо Твое избави, Тя присно хвалящее, Спорительнице Дево Всеблаженная.
Слава и ныне: глас тойжде
Амвросия богомудраго в помощь призовем, во еже со Спорительницею Девою помолитися, да избавит Господь глада душевнаго обитель Оптинскую и вся веси земли Русския словом животворным насытитит.
по ныне отпущаеши:
Тропарь гл.3
О Пречистая Дево Марие, Мати Царя Небеси и земли, благоутробно на любящих Сына Твоего Христа Бога нашего призирающая, подаждь нам вся к вечному спасению потребная, от всякаго зла и утеснения избави, и, Спорительница хлебов сущи, нивам нашим угобзитися устрои, души же изсохшия росою Небесною напои, да плод добр покаяния принесут.
ин Тропарь глас 3
Всея вселенныя Питательницу, нищих Заступницу и обидимых Покров, вернии познавают Тя, Дево Богородительнице; Хлеб бо Божественный во чреве Твоем истинно испечеся, сохранив неврежденна ложесна Твоя, Непорочная. Темже сладости Божественныя причастниками нас сотвори и ниву Господню неврежденну соблюди до скончания века. Аминь.
ВЕЧЕР
На Господи воззвах: стихиры гл. 1
подобен: Небесных чинов:
Приидите, православнии народи, возблагодарим Питательницу нашу, всея вселенныя великое сокровище, Хлеба насущнаго Подательницу, млеком питавшую Питающаго вся; в песнех духовных почтим Богоотроковицу Марию, Яже дланьма Своима ниву Господню хранит, в снопы спасаемых верныя собирающи и ересей плевелы отметающи.
Госпоже Всемилостивая, Царице Небесе и земли, на облаце яко на престоле возседящи, землю русскую обходиши и делателей нивы Господней благословляеши, и Спорительницею хлебов являешися, яко Мати сущи Зиждителева и всея вселенныя Питателя.
Христианом Помощнице, верным твердый Покрове, укрепи нас, Владычице, недостойных раб Твоих, нивы наша угобзи, жительство же возвыси, во еже руками деяти, устами же славословити, душами добродетелей плод в Житницу Небесную сторицею приносити, Твоим Богомати ходатайством, благодаряще о всем Сына Твоего.
Оляденевшия нивы душевныя теплым дождем молитв Твоих ороси, Солнца Правды Христа Облаче росоносный, Дево Богородице, Матерним же попечением яко земледеланием бразды сердечныя очисти, в ня семена слова животнаго всевающи, и пажить спасаемых плодоносну покажи, Спорительнице.
Слава и ныне: глас 5
Посетила еси землю Твою, Дево Владычице, и упоила еси ю, еже обогатити ю: уготовила еси пищу нам, яко тако есть уготование, одеяшеся овцы пажити Твоея одеждею веселия, ибо удолия умножиша пшеницу: воззовут благодаряще и воспоют: Радуйся, Спорительнице хлебов наших; радуйся, Трапезо таинственнаго веселия; радуйся Хлеб неснедаемый алчущим подающая и Питателя всея вселенныя на руку Твоею носящая. Радуйся, Мати Божия, помилуй и спаси рабы Твоя.
Стихиры на литии, глас 1
Небеса да воспоют Божия Матере славу, гори и холми согласно да возгремят, поля дубравныя и нивы хвалу таинственно да восплещут, яко Всемилостивая Госпожа всея твари на облаце предста, руце благословеннеи молебственно о людских гресех к Сыну Своему простирающи и Матернее дерзновение употребляющи. И, о чудесе — двери милости небесныя отверзаются, поля же тука исполняются, земля цветы смиренномудрия прозябает, молитвою покаяния благовонствующи; темже благодарно вси вернии да возопиют: слава Ти, Мати Божия; Спорительница сущи хлебов и нивы одушевленныя Споручнице, помилуй нас.
Слава, и ныне: глас 7
Боголепную Отроковицу в песнех почтим; Девическую красоту яко Рай словесный, яко Скинию нерукотворную превознесем, в Нейже Слово Плоть бысть и преискренне нам приобщися, питие жизни вечныя растворив: ядите Тело Мое и пийте Кровь Мою,— Премудрость Божественная глаголет, Хлебом Небесным насыщая всех, любовию восклицающих: о Спорительнице хлебов, Мати Небесная, всея вселенныя Питательнице, неизреченна слава Твоя и милость, не остави нас, все упование на Тя возложивших.
Стихиры на стиховне глас 4
Жатвы и весны Сын Твой Господин есть, Дево Богоневестная, Ты же покаяния весны нам достигнути помози, Ластовице Богокрылая, да тепле сеюще слезами в бразды душевныя, рукояти псаломски радования пожнем и цветы благодарения принесем Тебе, Владычице.
Стих: Слыши, Дщи, и виждь приклони ухо Твое
Яко благоуханный Рай и медоточный, яко палата царская и красная, яко село сладкое чрево Твое, Боговместимая, Агнец бо Божественный в Тебе упасеся, Иже Кровию Своею мира грех очищает и питает верныя Божественно, на пажити живота изводя стадо Свое под Твоим, Богомати, покровом.
Стих: помяну имя Твое во всяком роде и роде
Земля новая и обетованная, из Неяже течет мед и млеко, алчущия сладостию Божественною питающая; земля, на Нейже Животворная Лоза процвете, вином оставления души, грехом изгибшия, напояющая, Ты еси, Дево Богорадованная; Тя пророческими гласы восхваляющия сподоби в покаянии пожити и Царствие Небесное унаследовати.
Слава, и ныне: глас 1
Пророкоименитая Дево Боголепная, Раю словесный и Скиние Божественная, Руно Гедеоново, Росо Неботочная, Горо Даниилова, Еяже ради небесныя горы возрадовашася и небеса искапают сладость, на души наши росу благодати Твоея ниспосли и поля наша тука исполни, Спорительнице, да плод трудов наших в житницу небесную принесем и нищия препитаем и в радости возопием: радуйся, Обрадованная, с Тобою Господь и Тобою с нами до скончания века. Аминь.
НА УТРЕНИ
На Бог Господь: тропарь глас 3
Пречистая Дево Марие, Мати Царя небеси и земли, /
благоутробно призираеши на любящих Сына Твоего, Христа Бога нашего, /и труждающихся во имя Его вечнаго ради спасения, /и подаеши им вся обильно к наслаждению./Спорительнице сущи хлебов им, /
избавляя их всякия нужды и утеснения,/и устрояя им, рабом Твоим сущим, избавление вечныя муки и жизнь вечную.
По первом стихословии, седален, глас 2
Небесным светолитием украшаема, небо явилася еси одушевленное, Богородительнице, Солнце Правды царственно имущи в Себе; темже лучи благоволения Отча простри к нам, Дево Чистая, и нивы наша плодоносны сотвори, плевелы же дущетленыя исторгни, яко Спорительницею показалася еси нам, Всемилостивая.
Слава и ныне: глас тойжде
По втором стихословии, седален, глас 3
Церкве честныя бразды насеяшася, семенем священных молитв Твоих, Дево Богоблаженная, и Божественною благодатию клас израстися спасения надежды и веры, имиже всяка душа питается; темже и ныне мир и благоустроение жительству нашему одожди, да в тишине глубоцей Твою благостыню славим, Дево Всепетая.
Слава и ныне: глас тойжде
По полиелее седален глас 1
подобен: Ангельския силы:
Девическаго Твоего чрева красен Клас явися, мирови бо Жизнь израстила еси. Сего ради вернии вси по долгу Тебе, Богородице, вопиют, славяще честное Твое празднество, Пречистая: слава любви Твоей к роду человеческому; слава державе Твоей в земли Рустей; слава милосердию Твоему, Мати любоблагоутробная.
Стихира по 50-м псалме глас 6
На земли Тя небо, Чистая, показа Иже во утробе Твоей вселивыйся Бог, яко плоть приим Иже естеством незримый; темже на путь спасения стопы наши направи и творением заповедей Сына Твоего Небесная нам улучити всесильным Твоим предстательством Того умоли.
Канон гл. 2,
Песнь 1
Моисейскую песнь восприимши, возопий, душе: Помощник и Покровитель бысть мне во спасение, сей мой Бог, и прославлю Его.
Мариам Деву возвеличим, вернии, яко облак сущи Божественный, новому Израилю Манну небесную одожди, от неяже ядшии не умирают.
Ангельскаго хлеба древле вкуш Израиль Питавшаго не возблагодари, мы же, благодарни суще, возвеличим Деву, Спаса нам рождшую, Плоть верным в снедь давшаго; Юже молим да неосужденно ко Святым Таинам приступим и да не лишит нас Господь тех приобщения в час смертный.
Квас естества человеческаго прием от кровей Твоих, Дево Всечистая, Зиждитель, и тесто вскисло есть, и в ложеснах Твоих Хлеб Небесный испечеся; темже нас сею снедию выну питай.
Идеже хощет Сын Твой, Владчице, побеждает естества чин; яко Тебе Матерь и Деву сотвори, пятию хлебы пять тясящ насыти и Плоть Свою таинственно хлеботворит, верныя питая Божественно.
Богородичен: Ангельския силы Тя превозносят, Марие, и земнороднии хвалы песненно сплетают, яко Рождеством Твоим мир во вселенней утвердися, и небесными надеждами земля возрадовася.
Песнь 3
Процвела есть пустыня, яко крин, Господи языческая неплодящая Церковь пришествием Твоим, в немже утвердися мое сердце.
Матеродевственная слава Твоя всю исполнь вселенную, яко Ты, Дево Богоневестная, надеждо неплодым еси, девству же хвала, матерем утешение и даров Божиих даров.
Древо Животное посреде Тебе, Богорадованная Дево, процвете и нов Тя рай Господь показа, Плод израстивший, всю вселенную питающ, Имже ад огорчися и праотец Адам сладость вкуси.
Евино преслушание Рождеством Твоим, Чистая, разрешися и терпеливое Адамово послушание увенчася, той бо в поте лица своего трудишеся, покаяние принося, и услади горечь его Господь – Сын Твой, Дево, и Живот всех.
Воды Божественными напой алчущия души и хлеба животнаго нам подаждь, дети Твои православно взывают, Марие Дево, Житнице Слова и Облаче Духа, на пажити преданий Твое стадо соблюдай.
Богородичен: Одожди нивы наши, яже на земли, наипаче же нивы душ наших и угобзи я, яко Тя едину Помощницу вемы, Дево, хлебов Спорительницу и человеков Спасительницу.
Седален, глас 4
Икону Твою, Пречистая Дево, старец блаженный Амвросий написати повеле и Спорительницею хлебов ю наименова, яко Ты еси в трудех человеком Помощница и нивы одушевленныя Хранительница; темже молим тя: не остави нас, грешных и заблуждающих, семена же спасительныя в душах наших насей и возрасти.
Слава и ныне:
Спасительный кров и всех радование, предваряющая скоро и спасающая, умилосердися и ныне, взываем к Тебе, Чистая, на нас, призывающих Тя всегда во обстоянии: предстательства бо инаго не имамы.
Песнь 4
Прозорливе пророк тайноводимый Твоему, Христе, пришествию ужасается, еже предрекий вопияше: хваления Твоего исполнися земля, Боголепно бо нашу нищету не презрел еси, но пришел и спасл еси.
Рукояти пожинаем радости, песненныя хвалы Тебе плетуще, Владычице, и душепагубнаго избавляемся глада, яко Питателя родила еси, всех Господа.
Покров Твой над нами простри и людем Твоим утешение даруй; да изобилие плодов земля принесет, наипаче души наша добродетельми да процветут, матерними Твоими всесильными мольбами.
Чествующе икону Твою, Мати Божия, умильно взываем к Тебе: Стамна сущи златая, древле манну носящая, нам хлебов Спорительница буди.
Образ дивный Амвросий преподобный написати заповеда, на немже Царица Небесная, на облаце сидящи, руце молебно простирает; Тойже вопием: ниву Господню сохрани и нивы хлебныя угобзи, плевелы от обоя отметающи.
Богородичен: Жизнодателя Мати, Дщи Адамова Дщи, Дево Неискусобрачная и Богоневесто Прекрасная, посети род христианский, Тя гласы пророческими воспевающий, и всякую скорбь утоли, и нужды избави.
Песнь 5
Ходатай Богу и человеком был еси, Христе Боже: Тобою бо, Владыко, к Светоначальнику Отцу Твоему от нощи неведения приведение имамы.
Толиких бед Тобою избавившеся и толиких насладившеся богатых щедрот, неумолчными гласы воспеваем Тя, Богородительнице, и зовем: радуйся, Ходатаице спасения нашего.
Яко скиния нерукотворенная, и трапеза тайная, и предложение хлебов, и Святая Святых большая, Царице Небесная, о нас молящися не престай и не остави нас лишены быти Твоего предстательства.
Спорительницу Тя хлебов вемы и труждающихся Похвалу, и умных делателей Наставницу, и милостивую Заступницу роду христианскому; не остави нас творити волю свою, но волю Божию исполняти умудри.
Почести песененныя Тебе, Единей Приснодеве, приносим и Питателя Питательницу Тя нарицаем, Всечудная Зиждителя Матерь, девственником светлую отраду, и душ алчущих всесладостное насыщение.
Богородичен: Обитель Оптинскую сохраняй Матерними Твоими молитвами, и вся в ней труждающияся спасай, Богородительнице, и покрывай омофором Твоего всесильнаго заступления.
Песнь 6
Глас глагол молебных от болезненныя, Владыко, души услышав, от лютых мя избави: Един бо еси нашего спасения виновен.
Родове родов плетут Тебе песни, Владычице Чистая, яко увенчана есть земля венцом щедрот Твоих, но милости Твоя, Богоневестная Дево, воспевающим Тя, яко Спорительницу хлебов, умножи.
Слово Божие, Дево Чистая, прозябшая, плевелы злыя в душах наших изсуши и мысли лукавыя искорени, добродетелей же красныя прозябения насади.
Терния и волчцы земля по падении Адамовом израсти и грех в души человеческия всеяся, но Тя землю нову Творец содела, Богоблаженная, Иже и прозябл есть Древом Животворным из Твоих ложесн.
Евино решится проклятие Твоим Рождеством, Пречистая, и сынове Адамли, в поте лица труждающеся, не умирают, Божественный Плод Чрева Твоего вкушающе, Богородительнице, и вернии сладости Рай наследуют.
Богородичен: Летнюю память Твоей иконе совершаем, Спорительнице, и день от дне непрестанно Тя восхваляем, темже милости пробави роду христианскому, и жито умножи полей, и цветоносие добродетелей даруй, и лето благоприятное душам.
Кондак гл. 2
Спорительница хлебов нам явилася еси, Дево Мати, Пречистая Богородице, от плевел и ересей души наша хранящи и труждающимся помощь подающи, делателем же евангельским венец нетленный соплетающи; темже благодарне Тебе со Амвросием преподобным вопием: радуйся, Благодатная, Господь с Тобою, подаждь и нам, недостойным, росу благодати Твоея и яви нам милосердие Твое.
Икос
Житницу Тя Слова познаваем, Богорадованная Дево, яко угобзися в Тебе пшеница Живота Божественнаго, и ложесна Твоя благоплодная, яко село сладкое, показася всем жнущим спасение и вопиющим: Радуйся, отрасли неувядамыя розго; радуйся, Плода безсмертнаго стяжание; радуйся, Делателя делающая Человеколюбца; радуйся, Садителя жизни нашея рождшая; радуйся, Ниво, растящая гобзование щедрот; радуйся, Трапезо, носящая обилие очищений; радуйся, яко рай пищный процветаеши; радуйся, яко пристанище душам готовиши; радуйся, Благодатная, Господь с Тобою; и мы Тебе вопием: подаждь и нам, недостойным, росу благодати Твоея и яви нам милосердие Твое.
Песнь 7
В пещь пламенную юноши три ввержени ликование сплетения яко в нетленнем травнице Христу, снаслаждающеся, вопияху, поюще: отцев Боже, во храме Твоем благословен еси.
Неоранна явилася еси бразда, несеянный Божественный прозябшая клас, Имже алчущих напитала еси Божественными дарованьми и благодатьми.
Икона Твоя, Дево, источник чудес показася, от негоже жаждущии изобильно снабдеваются и недужнии здравы бывают, и земля клас сторичествующий плодоносит.
Царица сущи Небесе и земли, на облаце легцем возседящи, вся ны труждающияся благослови, и полям влагу одожди, душамже нашим росу благодати Твоея, Пречистая, источи.
Ангелов в помощь нам посли, Дево, плевелы ересей исторгни и злочестивыя иконоборцев уста загради, Богородительнице, и нас в вере Православней укрепи и спаси нас.
Богородичен: Пажить плодоносну стадо Твое, Богомати, обретает, благодатию Сына Твоего и Бога хранимо. Темже волки душетленныя, души наша похитити ищущия, от нас отжени, да Пастыря своего не николиже оставим.
Песнь 8
В купине Моисею Девы чудо на Синайстей горе Преобразившагося иногда, пойте, благословите и превозносите во вся веки.
Лозою евангельскою процвела еси, Дево, Грозд зрелый, Царя Христа, породивши, Имже смерть погибе и вернии поют и превозносят Тя, Матерь Его, во вся веки.
Спорительницу Тя поем, Мати Благая, Благаго бо Господа родила еси, Иже ниву одушевленную хранит дланми Твоима и земли благоплодие дарует матерними Твоима молитвами.
Новое чудо икона Твоя, Владычице, явися, тою бо земли плодородие даруеши и душам цельбы точиши, Церковь же цветущу показуеши, мы же песенно Тя благохвалим.
Яже на облаце возседяща и певцы Твоя благословяща, Царице, мглу душевную, молим Тя, разсей, бурю же греха разори, и день спасения нам возсияй Солнцем, от Тебе рождшимся, Марие Дево Преблагословенная.
Богородичен: Хлеб рождшая Небесный, Девою пребывши неопалима, якоже древле купина, терние страстей моих попали и боготворнаго Причащения сподоби, огнесветла творя мя, во вся веки.
Песнь 9
Утроба Твоя Чистая Богородице Дево, небесную тучу мирови укану, Живот возсияющую Вечный, и Адам со Евою в пажить райскую всели. Темже Тя, едину в женах Матерь бывшую Еммануилеву, вси роди, величаем.
Пренепорочное Чрево Твое, Богоотроковице Марие, стог честнаго гумна явися, миру нося пшеницу Живота, питающу всяческая, темже Тя яко виновну всех добрых, вернии по достоянию в песнех величаем.
Рукояти прими, Спорительнице, песненныя, яже Тебе Единей подобают, яко Питателя всея вселенныя родила еси, Иже Ангелом Свет, и земли плодородие, и душам спасение дарует Твоими молитвами, Богородительнице.
Источи нам, Спорительнице, росу благоволения Твоего, и поля наша тука исполнятся, холми радостию препояшутся, удолия пшеницу умножат и людие Твои возвеселятся, Богоневестная Дево, Тя в песнех непрестанно величающе.
Егда на Судищи Страшнем терния в пламени сожгутся, избави нас части сих посечения и верныя в Своя снопы собери, ныне же семена злоплодная грехов наших исторгни, да радующеся восхваляем Тя.
Матеродевственную славу Твою поем, Богоневестная Отроковице, якоже роса утренняя во чрево Твое Христос Господь укану и рай Тя нов медоточивый содела; такожде вернии надеждею сладчайшею насыщаются, яко путь их к Царству Небесному устроиши.
Богородичен: Иссопом молитв Твоих окропи стадо Твое, Всепетая, и пажить греха потреби, и цветоносный благоуханный рай отверзи, да водимии Тобою, Облаче Духоносный, пажить обрящем Живота, Тя величающе.
Светилен глас 2
Солнценосный Облаче и умная колеснице Слова, Дево Богоневестная, Господина жатвы моли мир Церкви даровати и ереси душевредныя искоренити, да поживем во всяком благочестии и чистоте.
Стихиры на на хвалитех глас 1
подобен: О, дивное чудо:
О дивное чудо! Источник Жизни на облаце является и к небеси сердца возвышает. Веселитеся, вси земнороднии, таковую Спорительницу хлебов стяжавше, возопием, вернии, Амвросия святаго имуще предходатая: Благодатная, радуйся с Тобою Господь, ниспосли нам росу благодати Твоея и яви милосердие Твое.
О дивное чудо! Предста Царица, Сына умоляющи помиловати землю Русскую, да ко спасению путь людие ея изберут, да благодатию Божественною плод добродетельный в душах их возрастет и да в радости тии возопиют: Благодатная, радуйся с Тобою Господь, ниспосли нам росу благодати Твоея и яви милосердие Твое.
О дивное чудо! Дево Спорительнице, яко вси, к Тебе прибегающия, рукояти упования на всесильную помощь Твою пожинают и благодаряще, возлашают сице: Благодатная, радуйся с Тобою Господь, ниспосли нам росу благодати Твоея и яви милосердие Твое.
О Дивное Чудо! Знаменение дадеся нам: Дева Спорительница на облаце грядет со Архангелы и Ангелы серпоносными, жатву всемирну пожать хотящими; темже, вернии, вси со страхом возопиим: Благодатная, помилуй нас, изми части плевелопосечения и огня адскаго пажить Твою.
Слава и ныне: глас 6
Днесь собравшеся, боголепно Владычицу воспоим, Тояже, Царица Небесная сущи, землю и человеков грешных, не оставляет, в скорбех и обстояниих утешающи, недуги исцеляющи, к покаянию приводящи, страсти душевныя врачующи и во всех трудех помогающи. Темже молимся: Мати Божия, не престай и на будущее время омофором Твоим православныя христианы покрывати и уповающия на Тя спаси.