Служба преподобному Гавриилу Самтаврийскому — Уставные заметки
Полиелейная служба преподобноисповеднику Гавриилу (Ургебадзе), Христа ради юродивому (†1995), составлена в 2018 году Владиславом и Серафимом Алпатовыми (г. Москва). Тропарь и кондак составлены по-грузински архимандритом Кирионом (Ониани) и переведены составителями службы на церковнославянский язык. Текст публикуется по авторской машинописи, цензурными инстанциями последование не рассматривалось.
Месяца октября в 20-й день
Преподобнаго и богоноснаго отца нашего Гавриила Самтаврийскаго
На Господи воззвах: стихиры, глас 6: О преподобне! / Яко гора явился еси / утвержден на Камени Жизни / неподвижим ветрами вражиими / и паче снега блистая венцем добродетели /, всея земли Иверския очи возводя / от земных ко горним, / к высоте небесного Царствия, / идеже водворяяся, // поминай нас, отче Гаврииле!
О преподобне! / От юности твоея поток жизни к Богу направив, / восшумел еси водопады хвалы Его, / и Жизни нетленныя водами землю твою / и окрестныя страны напоил еси, / и ныне нам утешения струи источи, / яко река из рая текущая, / идеже водворяяся, // поминай нас, отче Гаврииле!
О преподобне! / Возлюбил еси Крест Господень, / темже спелому грозду подобяся, / вда себе в точило скорбей и мучения, / вино благоуханное любве к Богу и людем искапа, / имже веселя души унывающих, / Древа Живота достиже, / идеже водворяяся, // поминай нас, отче Гаврииле!
Слава, глас 5: Кия похвалы ти принесем Гаврииле? / Да Царский образ на драхме сердца твоего обрящеши, / постом, бдением и воздержанием е очищаше, / слезами прилежно от скверны греховныя омываше, / темже и явися в тебе всем образ Владыки твоего. / Во всем явился еси подражатель Христов: / укоряем не сопротив вещаше, гоним кротце претерпеваше, / ночи в молитве пребывая, днем люди утешаше. / Наипаче же божественным смирением и любовию лик твой запечатлен. // Моли о нас Спаса, преподобне отче!
И ныне, Богородичен догматик, глас 5: В Чермнем мори / Неискусобрачныя Невесты образ написася иногда: / тамо Моисей, разделитель воды, / зде же Гавриил, служитель чудесе. / Тогда глубину шествова немокренно Израиль; / ныне же Христа роди безсеменно Дева. / Море по прошествии Израилеве пребысть непроходно; / Непорочная по рождестве Эммануилеве пребысть нетленна. / Сый и прежде Сый, / явлейся яко Человек, / Боже, помилуй нас.
На стиховне стихиры, глас 2.
Подобен: Доме Евфрафов: Днесь Церковь Картлийская / веселится о чаде своем, / се бо обрет Гавриил / благодать пред Богом, / ходатай явися о нас велий.
Стих: Восхвалятся преподобнии во славе / и возрадуются на ложах своих.
Церковь Богу воздвигнув, / Сам себе Владыце храм устроив, / утверди наша мысли, святе, / создатися нам во обители / Троице Единосущней.
Стих: Возношения Божии в гортани их / и мечи обоюдуостры в руках их.
Монах быв, / многим поможе, / беден быв, / многи обогати, / моли о нас святе Гаврииле!
Слава, глас и подобен тойже: Боже бессмертне, / даждь нам на враги победу, / утверди в мiре Церковь Твою, / спаси люди Твоя, / молитвами преподобнаго Гавриила.
И ныне, Богородичен от больших, глас 2 О чудесе новаго всех древних чудес! / Кто бо позна Матерь, без мужа рождшую / и на руку носящую всю тварь Содержащаго; / Божие есть изволение Рождшееся. / Егоже яко Младенца Пречистая, / Твоима рукама носившая, / и матернее дерзновение к Нему имущая, / не престай молящи о чтущих Тя, / ущедрити и спасти души наша.
Тропарь, глас 1, иверский: Якоже Владыка Христос славу Свою неизглаголанную / сокры, плотию одеявся, / такоже и ты юродства вретищем / покрыл еси свет Фаворский имже Тя Господь осия / яко исповедника и страдальца, / и пастырь душ явился еси, / отче преподобне Гаврииле, // моли Христа Бога помиловати души наша.
На утрени
По 1 стихословии седален, глас 1: От восток солнца до запад хвально имя Господне — / сице рцем вси, людие, творя память ныне светло / Божия угодника Гавриила преподобнаго, / яко видим добрая дела его, / и прославим Отца нашего, // Иже есть на небесех.
Слава, и ныне, Богородичен: Милостива буди нам, о Владычице, враг бо стрежет нас ужалити, егда в беспечности пребываем, но сокруши его немощную главу.
По 2 стихословии седален, глас 2: Надеяся на Господа, яко гора Сион / был еси, преподобне Гаврииле: / не подвижися мыслию живый во Иерусалиме, / горы окрест тебе быша, / и вопиял еси унывающим: / «Господь окрест людей Своих // отныне и до века».
Слава, и ныне, Богородичен: О Древо дивноплодное, Яблоко Живота вечнаго прозябшее, приосени ны благодатию Твоею, да согласно поем: Радуйся, Владычице; благоухания жизни исполни нас.
По полиелее седален, глас 5: Прежде безбожия воды наидоша на ны, / но Гавриил сопротив им иде, / жаром молитвы и любве иссушая их. / Ныне же ины испытания потопиша ны: / междоусобия и расколы, развращение и теплохладие, / нашествие иноплеменных и исмаильтян. / Но буди ходатай ко Кормчему ковчега Церкве, / да в нем от потопа избавльшеся, // поем помощь твою, Преподобне.
Таже степенна, 1-й антифон 4-го гласа. Прокимен, глас тойже: Честна пред Господем смерть преподобных Его.
Стих: Что воздам Господеви о всех, яже воздаде ми?
Евангелие от Матфея, зачало 43.
Стихира по Евангелии, глас 6: Воссия нам от земли сокровище, / преподобне Гаврииле, мощи твоя, / яже радостию облобызающе, / молим, осияй ны, отче, любовию твоею / и озаритися сердцам нашим моли // любовию к Богу и человеком.
Канон, глас 7, егоже краегранесие:
Иверския земли винограде, напой верных!
Песнь 1 Ирмос: Манием Твоим / на земный образ преложися / прежде удоборазливаемое / водное естество, Господи. / Темже немокренно пешешествовав Израиль, / поет Тебе песнь победную.
Иверския земли винограде, напой верных, на похвалу тебе сошедшихся, божественнаго веселия, истрезвляя ны от пиянства уныния и печалей изымая, и радости о Бозе исполняя нас.
Воинство фараоне в воде древле Моисей потопи, ты же, отче Гаврииле, воинство диаволе низрину молитвою ко Законодавцу, сего ради людем путевождь ко спасению показался еси.
Егда пройде Израиль море Чермное, песнь победную Богу воспе, и ны, отче, научаеши не человеком, но Единому Богу славу воздавати, славно бо прославися.
Богородичен: Рожденнаго от Тебе поем, Дево, и Господа нарицаем, но греси наша на ны вопиют. Моли, Мати Божия, да не услышим глас оный: «Отыдите, не вем вас».
Песнь 3 Ирмос: В начале Небеса / всесильным Словом Твоим утверждей Господи Спасе, / и Вседетельным и Божиим Духом, / всю силу их, / на недвижимем мя камени / исповедания Твоего утверди.
Самтавро возвеличися при обретении мощей твоих, преизливающимся народом, и яко источники воскипе исцелении и чудесы твоими, Гаврииле.
Кто не подивится дару исцелений иже в тебе яви Бог, наипаче же смирению, имже яко солию вся гнилость гордыни в приходящих к тебе отъемлется.
Исполнитися моли преподобне во благих прошению моему, ибо дает тебе по молитве твоей Даяй молитву молящемуся, наипаче же да утвердится в Господе сердце мое.
Богородичен: Явися чрево Твое Всенепорочная, стог честнаго гумна, миру нося Пшеницу живота, питающу всяческая. Темже тя яко виновну всех добрых, вернии по достоянию ублажаем .
Седален, глас 5, иверский: Радуйся, преподобне Гаврииле, умертвивый плотския страсти и девство возлюбивый, чистотою убеливыйся и яко горлица смирением подчинивый Христу разум свой, радосте наша отче Гаврииле, любовию ко всем божественною яко венцем украшенный, темже хвалим тя и любовию воспеваем ти пение сие.
Слава и ныне, Богородичен: Напоитися богатно слезами даждь браздам страстныя моея души, и плод принести ми сторичный, Владычице, сподоби, и сердце мое всякаго веселия исполни, да славлю Тя .
Песнь 4 Ирмос: Отча недра не оставль, / и сошед на землю, Христе Боже, / тайну услышах / смотрения Твоего, / и прославих Тя, Едине Человеколюбче.
Злии людие безбожнии тя безумным нарекоша, забыв давидское слово: «Рече безумен несть Бог», ты же отче сие безумие обличив, насаждаше в земли Божий разум.
Егда обрел еси преподобне бисер Евангелия, вся продал еси да его приобрящеши: покой, имения, время и силы твоя. Темже моли Господа насадити в нас Свой разум.
Многотепле почита отче лик Спасов, не токмо на досцех написанный, но наипаче в душах людей образ Божий потемнелый расчищая светле.
Богородичен: Лик твой прекрасен и любве исполнен быв, сие бо даде тебе Господь поелику и ты лики Его и Богоматере от поругания спасал еси, со сквернавищ их в церковь собирая.
Песнь 5 Ирмос: Нощь не светла неверным Христе, / верным же просвещение в сладости словес Твоих. / Сего ради к Тебе утренюю, / и воспеваю Твое Божество.
Илии Фесвитянину подобник быв, ревнуя поревнова о Бозе Вседержителе, и пламенне проповедал еси Евангелие.
Воссия нам от земли сокровище, преподобне, мощи твоя, яже радостию облобызающе, молим, осияй ны, отче, любовию твоею и озаритися сердцам нашим моли любовию к ближним.
Ищущим Света среди нощи неведения явися звезда ты, отче Гаврииле, руководствуя к Солнцу Невечернему и наставляя милостыни елеем освещати сердца.
Богородичен: Ныне время благоприятно, ныне день спасения: возжзи в нас, Пречистая, огнь решимости творити заповеди Сына Твоего.
Песнь 6 Ирмос: Плавающаго в молве / житейских попечений, / с кораблем потопляема грехи, / и душетленному зверю приметаема, / яко Иона, Христе, вопию Ти: / из смертоносныя глубины возведи мя.
Овцы заблуждшия Христу Доброму Пастырю возвращая, сам яко агнец кроток, помыслы твоя яко овцы добре паствил еси, молитвою утучняя и в жертву Владыце принося.
Гавриилу Афонскому подражая исшел еси превышеестественне по водам непостоянным монашеского жития, за образом Марии Девы устремився, и силою Божиею чудесно образ ея смирения в сердце твое принес.
Рукама своима храм Богу воздвигл еси, отче, иже не возмогоша безбожнии разорити; ты же был еси столп Христовой Церкви, яже адовыми враты вовек неодолима пребывает.
Богородичен: Афонскаго жребия не оставляеши, Богомати, паки же Иверия имать Тя помощницу, но и нашу нищету посети, новый удел Твой, люди чтущия тя тепле.
Кондак, глас 4, иверский: Непостижима есть милость Божия, / Егоже благодатию создание обожено лицезреем вси, / ты бо, преподобне отче, / образ Творца в себе утвердил еси, / вознесши естество свое в подобие Божие, / темже славим тя, отче Гаврииле, достойне похвалы, / яко был еси на земли гласом правды и голубем чистоты, / жительствовавши же в чудном смирении, / звенел еси лирою мудрости и любви органом, / ныне же на небесех предстательствуеши о спасении нашем, // ходатаю Божия благодати.
Икос Кия песни принесем ти от недостойных уст, преподобне Гаврииле, разве ангелорадныя, како воспоем жестокое твое житие, имже яко злато в горниле просветился еси, обаче зовем сице: Радуйся, милосердне душ врачу, радуйся молитве непрестанней учителю; Радуйся мучеником за Христа сродниче, радуйся юродивым ради Христа брате; Радуйся преподобне Гаврииле, Иверии похвало и радование.
Песнь 7 Ирмос: Пещь отроцы огнепальну древле росоточащу показаша, / Единаго Бога воспевающе и глаголюще: / превозносимый отцев Бог / и препрославлен.
Душею сокрушенною и духом смиренным пред Господем ходив, Гаврииле, обрел еси благодать, и ныне молися Владыце, да посрамятся вси являющии рабом Его злая.
Еще в юности претекл еси тщательно, яко пчела, цветники словесныя обителей Иверских, преподобне, сладкий мед добродетели собирая и в сердечныя соты влагая .
На гору Сион взыде благовествуяй и окрестным странам проповедуяй: возвратитеся ко Отцу Небесному, людие, и возопийте: «Благословен Бог отец наших».
Богородичен: Ангел сохрани три отроки в пещи халдейстей, ты же, Богомати, певцы твоя сохрани невреждены в горниле искушений, да поем: «Благословен Бог отец наших».
Песнь 8 Ирмос: Неопальная огню / в Синаи причащшаяся / Купина, Бога яви / медленоязычному и гугнивому Моисеови, / и отроки ревность Божия / три непреборимыя / во огни певцы показа: / вся дела Господня Господа пойте, / и превозносите во вся веки.
Пламень сластей воздержанием оросил еси, и в пещь скорбей восшел еси мужественне, сего ради и в сердце очищеннем распалаем был еси любовию к Богу и людем, преподобне.
Орли криле быша ти пост и молитва, имиже над долинами страстей воспарил еси, на высоте богомыслия гнездо ума твоего свив, и ныне нас настави горняя мудрствовати, а не земная.
Источник милости подаеши, Спасе, чрез твоего угодника, и мы благодарно Тебе вопием: «Благословен еси, Утешителю Боже».
Богородичен: Воистину ангелоподобен явися ты, отче, представая в нужде сущим и милостыни обильно проливая, да вси согласно вопиют: «Благословен еси, Боже, Богородицею помилуй нас».
Песнь 9 Ирмос: Нетления искушением рождшая, / и всехитрецу Слову плоть взаимодавшая, / Мати неискусомужная Дево Богородице, / Приятелище Нестерпимаго, / Село Невместимаго Зиждителя Твоего, / Тя величаем.
Един хитон Христов нешвенный, сверху из многих язык истканный — эллинскаго, иверскаго и славянских — раздрати волцы хищницы тщатся, но ты отче ходатайством твоим тщи их труды соделай, во единомыслии всех сохраняя.
Российстей земли ходатай буди, отче Гаврииле, моли всеблагаго Бога сохранитися ей от враг ненаветней, и древо веры укрепити, да под сению его вси вернии укрыются.
Нам чтущим тя и любовию хвалящим помогай, преподобне, да и в жизни сей благодаряще Бога пребудем, и жизнь оную безпечальную обрящем.
Изыдите, вернии, из домов и уединений своих, в церкви собранием почтим во уединении среди многолюдства подвизавшагося, истиннаго инока и всем нам теплаго молитвенника.
Богородичен: Христе Всецарю, предстательством Твоея Матери и преподобнаго Гавриила, милостив буди ми, песнь сию чрез них Тебе принесшему.
Светилен Светильник новый поставлен на свещнице, / преподобный Гавриил, егоже зряще / прославим Бога, тако сотворша человеки, / малым чим от ангел умаленных: / добродетелей молниями блещущих, / милостыни сокровищем богатых, / огневидне на угождение Ему стремящихся, и воззовем: / поминай нас, отче преподобне.
Слава, и ныне, Богородичен: Великому Гавриилу Архангелу подражая, приносил еси, отче Гаврииле, ангелокрасную песнь Богоматери: Радуйся, обрадованная; и мы ныне сликовствующе поем: Благословенная, Господь Силам с Тобою.
На хвалитех стихиры, глас 4: Лозу пречудную израсти земля Иверская, / процвет без числа боголюбезныя гроздия святых человек: / Нино, Тамару, Шио, Мириана и иных, / с нимиже причтеся и Гавриил Самтаврийский, / безумен миру и мудр Богу, / нищ тленными и богат вечными, / прост монах и патриархом советник, / егоже ныне просим // молитися за ны ко Господу.
Надеяся на Господа, яко гора Сион / был еси, преподобне Гаврииле: / не подвижися мыслию живый во Иерусалиме, / горы окрест тебе быша, / и вопиял еси унывающим: / «Господь окрест людей Своих // отныне и до века».
Витязю Христова воинства, / исповедниче веры и крестоносче, / за Христа мучения и биения / пивый яко питие бессмертия, / от сего смирения исполненный, / укрепи на тесном пути / путники христианы.
Милостыни сосуде преизливающийся, / отче Гаврииле Самтаврийский, / приими молитвы чтущих тя // и не премолчи за ны Господу.
Слава, глас 6: Осени сей радостный день приспе, / память Гавриила исповедника, / плодов добродетели исполнена, / егоже просим подати скорбящим мир, / больным исцеление / и всем нам насытитися // пищи небесныя.
И ныне, глас тойже, Богородичен от меньших: Архангельское слово прияла еси, / и херувимский престол показалася еси, / и на объятиях Твоих носила еси, Богородице, / Надежду душ наших.
Октоих глас 4, вторник, канон 1, песнь 8.
Октоих глас 3, вторник, канон на повечерии, песнь 1.
См. службу преп. Евмению Гортинскому, канон, песнь 3.Метки: Минея Дополнительная, богослужебные тексты, служба
Тропарь преподобному и богоносному отцу нашему Гавриилу Самтаврийскому
Тропарь (Глас 4)
Яко Владыка Христос Божество Свое сокры, в человечество облекши Е, и тем славу Свою неизглаголанную невидиму от нас сотвори, такожде и ты юродства образом покрыл еси славу твою и знамением исповедничества душ пастырь явился еси, отче преподобне Гаврииле, моли Христа Бога помиловати души наша.
Кондак (Глас 4)
Непостижима есть милость Того, Егоже благодатию создание обожено лицезреем вси, ты же, преподобне отче, образ Творца в себе утвердил еси, вознесши естество свое в подобие Божие, темже славим тя, отче Гаврииле, достойне похвалы, иже был еси на земле гласом правды и голубем чистоты, жительствовавши же в чудном смирении, звенел еси лирою мудрости и любви органом, ныне же на небесех предстательствуеши о спасении нашем, ходатаю Божия благодати.
Величание
Ублажаем тя, преподобне отче Гаврииле, и чтим святую память твою, наставниче монахов и собеседниче ангелов.
Служба преподобному и богоносному отцу нашему, Гавриилу Самтаврийскому
(минимум текстов для полиелейной службы по сокращенной практике)
На Велицей вечерни.
Блажен муж: На Господи воззвах, стихиры на 8:
Подобен: О, дивное чудо:
Пастырем агнцев приемлем тя, чтим тайноведение твое, зрим поверженныя тобою лукавыя, богоносне Гаврииле-чудотворче, блистание любве божественныя, просветителю народа своего, терпения столп неколебимый, твердость и оплот Церкви нашея, светоч всеблистающий и светило всея Грузии, благодеяний сокровище. Ходатай буди святыми молитвами твоими всем чтущим тя; ныне же моли Христа Бога нашего, преподобне Гаврииле, явити церквам нашим единение, мир и велию милость.
Воздают присно хвалу православнии людие божественным твоим добродетелем, богоносне Гаврииле, святости твоей и смирению и милосердию твоему. Ныне и мы, ведая милости твоя, прилежно молимся пред образом твоим и просим ходатайства твоего пред Христом Богом да спасемся от бед, верно находящих на ны, и о еже оставитися беззаконием нашим.
Радосте соратников и Православия утверждение, избранный служителю Святыя Троицы, ангелов друже, из земныя обители в небесную возшедый, прекрасный цвете райский, в царствии небесном укоренивыйся, умоли Господа окропити росою благодати нас, углебших в соблазнах и бедствиих.
Слава, глас 6:
Исполним молитву со свирелию мысленною и восхвалим Христа Бога нашего, Иже яви сицеваго отца и ходатая матери своей – уделоизбранному народу нашему, и хвалебныя молитвы возопием ему, радости иноческой и величию Картли, чудес источнику и великому помощнику и ходатаю, яко не имамы инаго толикаго среди отец наших.
На стиховне стихиры, глас 5.
Подобен: Радуйся, живоносный Кресте:
Радуйся, преподобне Гаврииле, умертвивый плотския страсти и девство возлюбивый, чистотою убеливыйся и яко горлица смирением подчинивый Христу разум свой, радосте наша отче Гаврииле, любовию ко всем божественною яко венцем украшенный, темже хвалим тя и любовию воспеваем ти пение сие.
Слава, глас 8:
Монахов множества вождем тя почитают, богоносне отче наш Гаврииле, яко исполняются божественной благодатию, юже оставил еси им. Присно моли Христа Бога помиловатися душам нашим.
На Утрени.
На Бог Господь, тропарь святаго, дважды.
Тропарь (Глас 4)
Якоже Владыка Христос Божество Свое сокры, в человечество облекши Е, и тем славу Свою неизглаголанную невидиму от нас сотвори, такожде и ты юродства образом покрыл еси славу твою и знамением исповедничества душ пастырь явился еси, отче преподобне Гаврииле, моли Христа Бога помиловати души наша.
Слава, и ныне, Богородичен: Еже от века утаенное:
По 1-м стихословии седален, глас 4:
Знамением крестным и молитвою вражия искушения победив, постом и воздержанием Господеви благоугодил еси: темже чудес приял еси дар, всем исцеления подавая, верою притекающим к раце мощей твоих, Гаврииле преподобне: моли Христа Бога, грехов оставление даровати чтущим любовию святую память твою.
Слава, и ныне, Богородичен:
Ужасно чудо зачатия, и несказанен образ рождества в Тебе познася, Приснодево Чистая, ужасает ум, и удивляет помышление: слава Твоя, Богородице, всем простреся во спасение душ наших.
По полиелеи седален, глас 7:
Господь наш Иисус Христос благослови тя на дела велии, разуму человеческому неудобоприемныя, и дарова ти богатую милость в жизни сей временней, а по святой кончине твоей ущедри тя даром с дерзновением ходатайствовати о душах грешных. Приими и ныне малое сие моление наше, с любовию ти приносимое, и теплым предстательством твоим умоли Владыку Христа Бога избавити нас от греха и нечестия.
Таже степенна, 1-й антифон 4-го гласа.
Прокимен, глас тойже: Честна пред Господем смерть преподобных Его.
Стих: Что воздам Господеви о всех, яже воздаде ми?
Евангелие от Матфея, зачало 43. Мф 11:27–30
Рече Господь Своим учеником: вся Мне предана суть Oтцем Моим, и никтоже знает Сына, токмо Oтец, ни Oтца кто знает, токмо Сын, и емуже аще волит Сын открыти. Приидите ко Мне вси труждающиися и обремененнии, и Аз упокою вы. Возмите иго Мое на себе, и научитеся от Мене, яко кроток есмь и смирен сердцем, и обрящете покой душам вашим. Иго бо Мое благо, и бремя Мое легко есть.
По 50-м псалме стихира, глас 6:
Днесь, вернии, духовно торжествующе в нарочитем празднике преподобнаго отца, и благочестно радующеся, тому тепле возопиим: радуйся, радуйся, святый исповедниче и Христа ради юродиве, преподобне отче наш Гаврииле, радуйся, небесный человече и земный ангеле: радуйся, многих на путь спасения наставивый: радуйся, верным похвало, Грузинстей и Российстей земли утверждение: молися о душах наших.
Канон Богородице параклисис, со ирмосом на 6, и святому два канона на 8.
Канон первый, глас 6.
Песнь 1.
Ирмос: Яко по суху пешешествовав Израиль по бездне стопами, гонителя фараона видя потопляема, Богу победную песнь поим, вопияше.
Имея рвение пламенное к вере праведней и любовию преумножая ю, святый старче Гаврииле, укажи нам путь доброслужения.
Присным сосудом Святаго Духа яви тя Господь, темже и благоухания твоих молитв яко фимиам добрый присно восходят к Богу.
Светильником Иверстей земли явился еси от Господа, преподобне отче наш, и благодать от Него получил еси во удержание сил коварных и преступных и исцеление немощных. Ныне являешься светильником народу своему и оберегаеши паству твою от всяческих страстей и соблазнов душепагубнаго врага.
Яко дано ти от Бога дерзновение ходатаем быти грешников, тако и ныне молю тя, преподобне, спасти душу мою от греховнаго порабощения.
Ин канон:
Невечерним светом блистаеши, отче наш, всеблаженне чудотворче Гаврииле, Божией силою преисполненне, темже моления наша приими и мир даруй с верою притекающим ко святому образу твоему.
Не отрини нас, всехвальне отче, со умилением ко образу твоему припадающих, и горячее моление тебе воздающих, устыдившихся беззаконий наших, обаче помилуй и укрепи, и умоли Господа победу нам даровати на демонския полки.
Богородичен: Всеблагая Владычице, Яже Преблагаго Бога плотию рождши, озлобленное страстьми мое сердце очисти, да верою и любовию величаю Тя.
Песнь 3.
Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
От младенчества был еси образом смирения и далече от всякия детския беспечности, в возраст же войдя, восхоте Богу послужити, отринул еси плотския попечения, иноческия жизни желая.
Восхоте погубити тя, льстивный зверь в откровении необычайнем боря тя во отрочестве сущи, ты же не устрашился еси свирепства его и возможе со Христом угасити силу его. Темже и ныне избави нас от напастей льстиваго.
От дома отеческаго отреклся еси, был еси нищ и чуждь в нем, и любовию Христовою укрепляемый, взял еси крест и послужил еси Господу.
Егда страна наша богоборчества исполнися, ты исполнися горним желанием и нача строити неустанно обитель Божию, юже трижды богоборцы разрушаху. Ты же помощию Божиею краснее устроял еси ю.
Ин:
Святый и честный образ твой, всехвальне отче наш Гаврииле, явися нам во спасение наше, научая стойкости в вере и служении Богови в ожидании милости Его; Ты же, Христа верный служителю, огради ныне паству твою от всяких бед и напастей, да молитвами твоими беспорочно пройдем путь жития нашего и обрящем Отечество Небесное.
Защити нас, преподобне отче, ото льсти и зла мира сего, и подаждь народу нашему силу на одоление коварных врагов и Церковь нашу мирну и непоколебиму сохрани.
Богородичен: Услыша Ева праматерь: в печалех родиши чада. Ты же, Чистая Дево, услышавши: Господь с Тобою, радуйся: радованным гласом печаль праматере потребила еси.
Седален, глас 1:
Святыя мощи твоя явишася источник чудес неисчерпаемый народу Божию и кладезь целительный от недуг и болезней, душевных и телесных, яко знамение оставления многих согрешений наших и яко сокровище благодати Духа Святаго. Востечем убо с веселием в обитель Самтавро, идеже ты, отче, почиваеши, и всяк притекаяй к тебе с верою, приняв помазание елеем от лампады твоея, святе исповедниче и Христа ради юродиве, отче наш Гаврииле, якоже от тебе самаго благословение, получает сим здравие души и телу, темже немолчно зовем ти: моли Христа Бога, грехов оставление даровати чтущим любовию святую память твою.
Песнь 4.
Ирмос: Христос моя сила, Бог и Господь, честная Церковь боголепно поет взывающи, от смысла чиста о Господе празднующи.
Великия нечестия и гонения учиниша богоборцы над церквами и верующими, и мнози от жизни иноческия отрешишася, ты же избрал еси узкий и тернистый путь и не колеблясь исповедовал еси правое исповедание.
Егда безбожие умножися, веледушно претерпел еси иссякание любве, со смирением принимая поношение, аще и возрастом юн бе, обаче мужем мудрым являшеся.
Пострижения иноческаго удостоился еси, наречено имя тебе Гавриила Афонскаго, ему же уподобился еси монашеским подвигом. с ним же вкупе явистеся утешителями народа иверскаго.
Священства саном облекся, проповедовал еси пречистую веру Христову и, просвещая народ свой, увязший в пропасти язычества, учил еси его заповедям божественнаго учения.
Ин:
Благий рабе и верный, и делателю винограда Христова, с бодростью претерпевый тяготу дне и умноживый талант свой, сего ради и причтен еси с юродивыми всеми к радости блаженства Божия.
Богомудре старче, словесами божественными обличил еси безбожие богоборцев-властителей, и тем Православия венец возвысил еси, и Церковь Грузинскую возвеличил.
Богородичен: Ты еси, Пречистая Богородице, прибежище наше и утверждение, моли Сына Твоего и Бога нашего подати нам спасение и грехов оставление.
Песнь 5.
Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
Поругания терпя от безбожных, пришел еси в Вифанию Иверскую, идеже подвизашася отцы-чудотворцы: Георгий и Иоанн, иже обучиша тя доброслужению, и, укрепившись в познании, получил еси благословение и ведение сокрытых таин Божьих.
Служение твари, а не Творцу всяческих, возмути тя, отче, ты же всем сердцем любя Христа, не возможе терпети осквернения имени Его и восста противу богоборцев, сжег образ идола и богоненавистника.
Представ пред прислужниками идола того, сильными мира сего, дерзновенно рекл еси: «Не подобает величие сицевое трупу человеческому, достойно же оное токмо Христу, воскресшему из мертвых», сего ради и мучиша тело твое, и в темницу тя заключиша.
Ни мучения, ни страх смертельный не возможе тя разлучити от любве Божия, язвами бо бесчисленными покрылся еси и яко злато в горниле очистил еси душу свою во испытаниях тяжцых.
Ин:
Просиял еси в Грузии, блаженне отче Гаврииле, и обличая зло юродством своим, обращал еси многих к Солнцу Правды, тем разрушая дела тьмы началозлобного врага.
Якоже солнце просвещает притекающих к тебе, богоносне Гаврииле, празднество и память твоя, и ныне моли, преподобне, да призрит с милостию Спас на род наш и оградит нас от страшных бед и испытаний.
Богородичен: Бога, Егоже родила еси, Пречистая Марие, моли, рабом Твоим подати прегрешений оставление.
Песнь 6.
Ирмос: Житейское море воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Иже безумно тя погубити желаху, ничесоже сотворити можаху, яко Господь, стена верным, от смерти тя укры, и безбожных поругания не возмогоша поколебати несокрушимую волю твою.
Попечением Патриарха свободу паче чаяния обретши, вознося хвалы и молитвы Господеви, к службе в Сиони возвратился еси. Обаче и тамо отторгну тя враг от служения Господеви, желанием властителей безбожных, и нищ бе, без пристанища многия лета пребыл еси, посреде плит могильных, терпя зной непосильный и хлад смертельный.
Не возмогши терпети нечестия и к ближним любовь имея, обличал еси, отче, за безбожие народ свой, да не поразит их рука Господня. Моли Христа Бога, отче наш милостиве, о спасении нас грешных, избавлении от вражиих напастей и о еже покрыти нас от междоусобныя вражды.
Ин:
Похвалами и песньми воспоем пастыря, дивнотворениями своими Церковь приукрасившего, и духовного наставника иверцев, яко солнце просиявшего народу нашему и любовию к Богу и отечеству его просветившаго.
Прославим верою и любовию преподобного Гавриила, духовного отца народа иверскаго, и с кротостию припадем к нему, молящи даровати нам покаяние и исправление.
Богородичен: Ныне к Тебе прибегаю, Пречистая, спаси мя молитвами Твоими и соблюди: елика бо хощеши, можеши, яко Мати Всемогущаго.
Песнь 7.
Ирмос: Росодательну убо пещь содела ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших.
Зря нижайшую скромность твою к служению Богови, Патриарх Ефрем пригласи тя паки ко алтарю, и, приобщив тя Тайн Христовых во святую обитель Самтавро посла тя. Идеже ты, жителю Нового Иерусалима, в малой келии у куста купины Святыя Нины, Просветительницы всея Грузии поселился еси, и со трепетом приношению Жертвы бескровныя и проповеди Царствия паки отдался еси.
Перейдя в башню Царя Мириана, благоукрасил еси ю спасенными крестами и иконами твоими, чудотворениями вразумляя монахинь и паству, указуя им врагов невидимых, обучая их постоянным молениям.
Возложив на плечи своя подвиг юродства и старчества Христа ради, мудре отче наш, признан был еси безумным и поругания от священства и народа приял еси. Ныне же еси Святей Церкви Иверстей сокровище и благодать на спасение верующих, возносящих хвалу делам Твоим.
Ин.
Хвалебными молитвословиями воспоем во граде Тифлисе, яко в пустыне, явльшагося предводителя и обличителя народу своему, и ходатая, преподобного старца Гавриила, иже мечом Слова Божия ссече нечестивых, ихже коварство разруши Христос Бог.
Изумляют бесчисленные дивнотворения Твои, преподобне Гаврииле, но паче изумляет исповедание Твое и любовь к Богу и ближнему, ибо в пору безбожия достигл еси смысла учений Божиих и был еси дом Богу желанен.
Богородичен: Богородице Дево, рождшая Слово паче слова, Зиждителя Твоего, Того моли с преподобным Гавриилом, помиловати души наша.
Песнь 8.
Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.
Давидски сокрушенным сердцем и смирением взывал еси: «червь аз есмь, а не человек, поношение человеков и уничижение людем моим», тако показал еси нам великое смирение твое, дабы не узнаша людие о добродетелях и святости твоей.
Будучи выну в скорбех, блаженне, и в непрестанной памяти Страшного Суда, слезами омывался еси и подобно первоотцам оплакивал еси еще при жизни временной себе самаго.
О, чудотворче старче наш несравненный, дарованы тебе мудрость и познания божественные от Святого Духа, тако и благодать помилования и зрения грядущих и величайший талант всеобьемлющей любви.
Скрытую тайну яко явь зрел еси, честный отче, и истину о будущем сказывал еси, и ныне помози нам укрепити разумом и мудростью сердца наша, во еже имети волю видения добра и зла и не оступитися от пути истинного.
Ин:
Венцем хвалений увязем старца Гавриила, вретищем юродства облекшагося и сим благодати свет покрывавшего, ходатая всех и пособника, и скорбящим скорое утешение.
Паче солнца воссия слово твое, отче Гаврииле, егда проповедовал еси веру истинную, и рассея тучи греховныя, вселив в нас радость светлую, мы же, ведая дела твоя, преподобне, и ныне находясь в скорбех и напастех, просим помощи твоея.
Богородичен: Спасения Ходатаица нам явилася еси, Богородице, рождшая Спаса и Владыку всех: темже молим Тя, спасения сподоби всех песнословящих Тя верно во вся веки.
Песнь 9.
Ирмос: Бога человеком невозможно видети, на Негоже не смеют чини ангельстии взирати: Тобою же, Всечистая, явися человеком Слово воплощено: Егоже величающе, с небесными вои Тя ублажаем.
Недугом тяжким объят был еси, преподобне, и твердо переносил еси боли нестерпимыя. Прозрев же в Духе о часе кончины твоея, отче святый, пред иконою святителя Николая Чудотворца о благословении народа и Отечества твоего помоливыйся, тихо мир сей оставил еси.
Вверив душу твою Господу, приобщился еси собору святых, и по завету твоему яко древних отцев предаша земли мощи твоя, в циновку завернувше я во дворе Самтавро. И абие святые мощи твоя явишася источником чудес неисчерпаемым народу Божию и точат реку исцелений от болезней и недуг.
Не токмо верныя, но и ленивии и маловерныя желают прикоснутися к сосуду с нетленной кровию твоею и просят тя о милости, ты же, внемля мольбам, даруеши им щедро радость.
Видяху мнози священнослужителие исцеления от могилы твоея, ныне вкупе с паствою величают тя яко великаго святаго, новаго чудотворца и чтут память твою присно.
Ин:
Восхвалим днесь православных иверских предводителя, столпа добродетельного, преподобного и Христа ради юродивого Гавриила, супротив коего воздвигнутые козни вражии Христос низложи, Имеяй велию милость.
Приидите воспразднуем память преподобного Гавриила, пламенного молитвенника, заступника нерадивых и в опасности находящихся, егоже молитвами Боже помилуй нас!
Богородичен: Единаго от Святыя Троицы, Слова и Сына родила еси, Дево Пречистая, Егоже с преподобными и праведными моли о рабех Твоих, верою просящих грехов прощения.
Светилен.
Подобен: Жены, услышите:
Никогдаже предан был еси, честный отче наш Гаврииле, отдохновению и увеселению, но всегда облечен в молитву и бдение и во вретище приодет и на ложе твердом почивая, множеством трудов твоих выну помнил еси о Страшном Суде при Втором Пришествии, со страхом остерегал еси душу свою ото зла и паки и паки величал еси мироздания Творца.
Слава, и ныне, Богородичен:
По Бозе упование имуще на Тя, Пречистая Богородице, молим Ти ся: Рождшагося из Тебе умоли даровати мир вселенней и велию милость
На хвалитех стихиры на 6, глас 8:
Празднует Церковь Грузинская память твою и учреждает восхваление добродетелей твоих, богоносне Гаврииле-чудотворче, со ангелы зрителю божественных таин, бездно благодушия, ведателю несказанного, иноков отче, радосте монашеская, наставниче удалившихся от веры. Добрый старче наш, преподобне Гаврииле, укрепи нас в силе и мужестве и победы даруй над врагом-супостатом, гнетущим нас.
Слава, глас тойже:
Проповедал еси покаяние яко Иоанн Креститель, всенощно руце в молитве простирал еси яко пророк Давид, в милосердие и терпение приоблеклся еси, добродетели делателю старче Гаврииле, темже и Спасу нашему Христу угодил еси, и удостоился еси радости непреходящия со всеми святыми вкупе.
Житие святых для верующих, является путеводной нитью в Царствие Небесное. И один из таких праведников – преподобный Гавриил Ургебадзе. Именно сама жизнь святого старца, который является нашим современником, представляет прекрасный пример христианской любви и смирения. Отец Гавриил наставлял, что смирение дарует человеку благодать и даже тяжелое испытание не заденет его. Молитва Гавриилу Ургебадзе помогает людям преодолевать невзгоды, сохраняя веру и любовь.
История преподобного Гавриила Ургебадзе
Архимандрит Гавриил (Ургебадзе) – 29.08.1929 – 02.11.1995 гг. жил в Грузии. С детских лет у мальчика была вера в Бога и стремление к служению. Желание стать монахом у Гавриила появилось в юношеском возрасте. После армии, вернувшись домой, он стал служить псаломщиком в Сионском соборе, а немного позже принял монашество в Кутаисском монастыре. Монашеским именем был наречен в честь старца Гавриила Афонского. За борьбу с советской пропагандой и восхваление идолов ленинизма старец подвергся репрессиям. Но гонения не сломили его. Прикрываясь маской юродивого, он обладал провидческим и чудотворным даром, но старался это не демонстрировать, а своим примером любви к Богу и добротой к людям, вдохновлял их на обращение к высшим ценностям. Старец в своих душевных беседах поучал людей, что даже когда принимаешь пищу, надо думать о страждущих и голодных, помогать им и молиться за них, быть милостивым. Постепенно слава о нем распространилась по всей Грузии. По окончанию земного пути, согласно завещанию старца, тело его похоронили, завернув в циновку в женском монастыре Самтавро в городе Мцхету. В 2012 году он был причислен к лику святых.
День памяти: 2 ноября
К могиле святого идет нескончаемый поток прихожан и приехавших с дальних мест. Люди чтят, и молятся святому Гавриилу Ургебадзе, получая от него помощь, заботу и благодать в душе.
Молитва Гавриила Ургебадзе Пречистой Богоматери
Преподобный Гавриил Ургебадзе рассказывал прихожанам, что молитву Пречистой Богоматери, он получил с ее могилы. Есть предание, что тот, кто читает эту молитву и постоянно носит ее в сердце будет защищен от всякого зла, а страждущие и болящие исцелятся.
— Радуйся, благодатная и всемилостивая Матерь Божия, Ходатаице христиан, яко радуется тебе Собор Ангелов и служат тебе Архангелы на Небесах;
— Радуйся, печальных утешительнице, слепых жезле спасительный, притекающих с верою к тебе несумненная пособнице и ходатаице;
— Радуйся, святости горней трапезо;
— Радуйся, Владычняя палато пресветлая;
— Радуйся, кадило златое Создателя твоего;
— Радуйся, столпе златотканный;
— Радуйся, Дево Пресвятая и непорочная, Креста Солнечного подательнице Престолу Небесному. Покрый мя честным твоим омофором, о, неустанная молитвеннице наша. Имея оружием молитву сию, предаю в пречистыя руки твои душу мою. Настави стопы мои на стезю праведности и сподоби меня победы над злом, дабы войти в Царствие Небесное по милости Господа Бога и Спасителя нашего, Иисуса Христа;
— Радуйся, Пречистая Дева, Марие, Столпе непорочный и крепосте духовная;
— Радуйся, Невесто Неневестная;
— Радуйся, Матерь неискусобрачная и непорочная, что держала на пречистых руках твоих взявшего на себя все тяготы мира. Буди подмогой и ходатаицей недостойного раба твоего, защити мя во все дни живота моего от бед и искушений, даруй долголетие мне во благо, благослови мя пройти путь жизненный с почитанием и величанием имени твоего, дабы пети тебе в нынешнем веке и во веки веков. Аминь!
— Радуйся, Ангелов Царице, Госпоже Правосудия.
— Радуйся, Господь с тобою, Святая Святых, честнейшая Херувим и Серафим;
— Радуйся, Святая Дево, пособнице исправления грешних;
— Радуйся, мучеников цвете и отцев наших упование. О, Мария, Пречистая Дево, которой Христос Бог наш очеловечился и с человеки поживе, помилуй меня, раба твоего, укрепи меня силою Честнаго и Животворящего Креста Сына Твоего и направь мя на путь истины.
О, Святые Ангелы и Архангелы, о, покровители души моей, Архангелы Михаиле и Гаврииле, помилуйте меня грешного!
О, Пречистая Отроковице, матерь Бога Вышнего и Царице Всеблагая, Солнце правды и Славы, Превышняя Небес и светлейшая солнца, честнейшая Херувим и славнейшая без сравнения Серафим, предков наших упование, Величие мучеников и праведных всех радость и опоро; Авраама, Исаака и Яковля веселие и Гедеона руно орошенное; Моисеево, Аароново и всех святых отцев Украшение, кадильнице златая, подсвечнице прекрасная Небесного сияния, Манны Небесной ковчеже златой, Сосуде всечестный Духа Святаго, Царице моя Всепетая, Трапезо Пречистая, Скорбящих утешение, Христиан предводительнице, Пречистая Отроковице, Купино Неопалимая, необъятный и невместимый прозябший жезле Ааронов. Воистину жезлом нам явишеся ты и цветоком твоим сыне Твой, Иисусе Христе, Спасителю наш, Владыко и Творче, Властителю Неба и земли и всея твари Содетелю. Ты, рождшая Бога Слово плотию человеческою, до и после рождества Его Приснодева была еси, и ключ непорочности твоей Христос Божественным Своим знамением осенил, безсеменно воплотившийся от чрева твоего.
О, примирительнице наша с Богом Всевышним, ходатаице беспомощных и грешных, в волнениях житейского моря пребывающих пристанище и утешение, в темницах сущих свободительнице, покровительнице сирот, вдовиц защито и покрове, плененных грехом избавительнице, недугующих целительнице, в житии иноческом опоро и утешение, крепосте и упование наше.
О, Пресвятая Дево, венец победы Владычный, Пресвятая отроковице, Матерь моя и Царице моя Преблагая, покрый мя честным твоим омофором и защити мя от глумления сатаны, губителя человеческого рода, злого хулителя и врага моего. Помилуй меня, обнищавшего и немощного, бесчисленными злодеяниями прогневавшего Творца Моего и Судию Праведного. Притекаю под твой покров, в тебе токмо надежду и пристанище имаше, о Всепетая, и яко раб недостойный взываю тебе, Царице моя, со слезами многими, дабы Сладчайший Иисусе, Жизнеподателю, твоим заступлением за грехи мои не отторгнул меня, недостойного и непотребного раба своего. Молю тебя, Пречистая Владычице, приведи мя ко Христу и умоли Сына твоего, дабы удостоил мя деснаго стояния и Царствия Своего, где нет ни слез, ни скорби, ни вечного наказания, ниже страданий и мучений, а только радость нескончаемая и свет лица Господа моего, бытие вечное и светлое, и безграничное единение со святыми и со ангелы Его. Удостой, Царице, непотребного раба твоего, избавления от грехов моих и страстей и исполни уста моя и язык мой услади хвалениями и молитвами, радостными и духовными, горячими и сердечными яко ангельскими, со святым Гавриилом вкупе взывающе:
— Радуйся, солнце Божественное и сладость нетварного света;
— Радуйся, Царице благовествования;
— Радуйся, средь матерей Дево всеблаженная;
— Радуйся, Источниче света всем породившая;
— Радуйся, Свет правосудия во тьме высветившая;
— Радуйся, Царице превышняя;
— Радуйся, умиротворение, радосте и житие непорочное;
— Радуйся, верных веселие;
— Радуйся, пророческое прозрение;
— Радуйся, апостолов славо и иноков венче, победительный мирови;
— Радуйся, благодатная, священнослужителей украшение;
— Радуйся, поющих и просящих тебе упование;
— Радуйся, избавительнице наша от греховных страстей;
— Радуйся, сладосте и красото всех рождённых;
— Радуйся, крепости источниче;
— Радуйся, прибежище и избавление страждущих;
— Радуйся, радосте рабов твоих;
— Радуйся, гонимых пристанище и величие горних селений;
— Радуйся, всепетая, покров и ходатаица наша;
— Радуйся, священства славо и веселие;
— Радуйся, райские двери отверзающая;
— Радуйся, радость нам подающая;
— Радуйся, от скорбей нас избавляющая;
— Радуйся, Владычества Небесного ключ;
— Радуйся, Матерь Христа Бога моего;
— Радуйся, чревом своим приявшая Утешителя смертных, Поправшего смерти державу;
— Радуйся, Невместимого вместилище;
— Радуйся, млеком возрастившая Христа нашего, Живодавца и Бога;
Господи, даруй мне кончину благую, напиши мое имя в Книге жизни Твоея и даруй мне благодать Твою! Помяни меня Господи, когда приидеши со славою в силе, яко Ты благословен еси во веки веков. Аминь.
